Міжнародны выставачны праект «Мінхва: мастацтва Карэі» арганізаваны Нацыянальным мастацкім музеем Беларусі і Асацыяцыяй World Peace Art Exhibition Committee (Рэспубліка Карэя) пры садзейнічанні пасольства Беларусі ў гэтай азіяцкай краіне. Увазе гледачоў прадставяць больш за паўсотні твораў сучасных майстроў традыцыйнага карэйскага жывапісу, якія створаны спецыяльна для дадзенай экспазіцыі і сімвалізуюць імкненне мастакоў перадаць дух і прыгажосць нацыянальнага мастацтва ў яго сучасным гучанні.

Мінхва — гэта народны карэйскі жывапіс, які зарадзіўся сярод простых людзей. Яго яркія фарбы, дэкаратыўная сімволіка і матывы прыроды выказваюць мары пра шчасце, даўгалецце, любоў і гармонію. Сёння мінхва — гэта не толькі частка культурнай спадчыны, але і жывое мастацтва, натхняе сучаснікаў на пошук прыгажосці і ўнутранай раўнавагі.

«Выстава стане важнай падзеяй у культурным дыялогу паміж Беларуссю і Рэспублікай Карэя. Яна адлюстроўвае супрацоўніцтва паміж нашымі краінамі ў галіне культуры і мастацтва, пацвярджаючы, што мастацкая мова ўніверсальная і здольная гаварыць аб самых глыбокіх пачуццях без перакладу», — адзначылі ў музеі.

Экспазіцыя працягне работу да 16 лістапада.

Чытайце таксама: Тысячы негатываў, паўстагоддзя здымак. Юбілейная выстава фотамастака Аляксандра Ласмінскага адкрылася ў Гродне