У экспазіцыі можна будзе ўбачыць больш за 80 твораў жывапісу і графікі, якія адлюстроўваюць асноўныя тэматычныя кірункі і этапы творчай біяграфіі Міхаіла Чэпіка. Яго мастацтва ў розныя перыяды насіла рысы «суровага стылю», сац-арта, авангардызму, але заўсёды заставалася самабытным і арыгінальным. Ён аднолькава паспяхова працаваў у розных тэхніках — як жывапісец, акварэліст, плакатыст, сцэнограф.

Ён нарадзіўся на Віцебшчыне і скончыў Мінскае мастацкае вучылішча, у сталіцы сустрэў спадарожніцу жыцця і стварыў сям’ю, 35 гадоў прапрацаваў мастаком-сцэнографам у Дзяржаўным тэатры оперы і балета БССР.

Міхаіл Чэпік стварыў свой вобраз Мінска. Прыхільнік яркага адкрытага колеру і планетарнага бачання, ён умеў выбраць нечаканы ракурс — часта з вышыні птушынага палёту. Усе мінскія пейзажы Чэпіка не проста пазнавальныя, а яшчэ і вельмі дакладныя. Наведвальнікі выставы ўбачаць жывапісныя палотны з панарамнымі мінскімі краявідамі, атмасферныя акварэльныя работы 1960-х гадоў, алоўкавыя замалёўкі сюжэтаў гарадскога жыцця. У экспазіцыі таксама прадстаўлены шэраг беларускіх пейзажаў — мастак адлюстраваў наваколлі Заслаўя, Раўбічаў, Прылук, узвышшы Лагойшчыны, бягомльскія лясы, астрашыцкія ўзгоркі.

Асобныя работы выставы адлюстроўваюць тэму Вялікай Айчыннай вайны, якую мастак прайшоў як салдат-пехацінец і сустрэў Перамогу ў Аўстрыі. Па ўспамінах дачок мастака, бацька не вельмі любіў гаварыць пра вайну.

Асаблівую цікавасць уяўляюць алоўкавыя замалёўкі працоўных будняў закулісся тэатра оперы і балета. Графічны дзённік мастак вёў на працягу ўсіх 35 гадоў працы ў тэатры. Асобныя лісты гэтага ўнікальнага дакумента ўпершыню прадставяць на выставе.

Экспазіцыя працягне работу да 14 снежня.

Чытайце таксама: Самабытнасць розных народаў, пейзажы гор і мораў. Выстава «Паміж небам і зямлёй» адкрываецца ў Гомелі