Часовая экспазіцыя пачне работу ў Малельнай зале капліцы-пахавальні князёў Святаполк-Мірскіх музея «Замкавы комплекс «Мір» 13 сакавіка. Выстава арганізавана сумесна з Карэліцкім благачыннем Навагрудскай епархіі Беларускай праваслаўнай царквы.

«У экспазіцыі будуць прадстаўлены больш за 20 царкоўных выданняў XIX — пачатку XX стагоддзяў. Гэта „Свяшчэнная гісторыя Старога запавету“ 1828 года выдання, „Дзеянні і пасланні святых апосталаў з апакаліпсісам“ 1876 года выпуску, два экзэмпляры „Мінеі“ — 1852 і 1912 гадоў, „Псалтыр“, выдадзены ў 1906 годзе, „Апостал“ 1908 года і іншыя», — расказала куратар выставы старшы навуковы супрацоўнік музея Наталля Марэцкая.

Дзень праваслаўнай кнігі ў Беларусі адзначаецца 14 сакавіка і прымеркаваны да выдання першай друкаванай праваслаўнай кнігі «Апостал» у 1564 годзе Іванам Фёдаравым.

Наведвальнікі часовай экспазіцыі «Жывое слова мудрасці духоўнай» атрымаюць магчымасць акунуцца ў свет праваслаўнай літаратуры, дзе кнігі настройваюць чалавека на выратаванне душы і паказваюць шляхі духоўнага ўдасканалення, адзначылі арганізатары.

Часовая экспазіцыя прадоўжыцца да 5 красавіка. Уваход на яе свабодны.