У Міністэрстве адукацыі Беларусі патлумачылі, ці можа педагог выдаліць школьніка з урока і хто панясе адказнасць. Паведаміла «Мінская праўда» са спасылкай на «Настаўніцкую газету».
Сітуацыя: на ўроку дзіця дрэнна сябе паводзіць, перашкаджае іншым. Ці мае настаўнік права выставіць яго за дзверы?
Не, не мае.
У ведамстве спаслаліся на Кодэкс аб адукацыі: кожны вучань мае права на атрыманне адукацыі, а таксама на павагу іх гонару і годнасці і абарону ад любых формаў гвалту. Акрамя таго, падчас навучальнага працэсу павінна забяспечвацца іх бяспека.
Педагогі абавязаны працаваць на прафесійным узроўні, выконваць этычныя нормы і паважаць вучняў.
Як караць парушальніка?
У ведамстве назвалі і дазволеныя спосабы, і поўныя забароны.
Што нельга рабіць настаўніку ні пры якіх абставінах?
- Выганяць дзіця з урока (настаўнік адказвае за яго бяспеку, пакуль той у школе).
- Крычаць, абражаць, зневажаць.
- Забіраць асабістыя рэчы (тэлефон, навушнікі).
Не пускаць у клас з-за спазнення або адсутнасці формы.
А што можна? Калі заўвагі не дзейнічаюць, у настаўніка ёсць законныя інструменты:
- Зафіксаваць парушэнне — зрабіць запіс у электронным або папяровым дзённіку, напісаць дакладную на імя дырэктара або завуча.
- Падключыць бацькоў — адправіць ім пісьмовы зварот, запрасіць на гутарку з класным кіраўніком.
- Паклікаць школьных псіхолагаў або сацпедагогаў.
- Прымяніць дысцыплінарныя меры — калі гэта прапісана ў статуце школы, вучню могуць аб'явіць заўвагу або вымову. Але гэта ўжо праз адміністрацыю, а не асабіста настаўнікам.
- Змяніць падыход на ўроку — правесці не сумную лекцыю, а гульню, спаборніцтва або семінар, каб пераключыць увагу класа.
- Зразумець прычыну дрэнных паводзінаў — часам дапамагае індывідуальная гутарка і пахвала за поспехі, а не толькі пакаранне.
А калі нічога не дапамагае?
- У крайніх выпадках адміністрацыя школы прыцягвае інспекцыю па справах непаўналетніх (ІСН) і іншых спецыялістаў.
