Выданне Neue Zurcher Zeitung апытала семярых экспертаў, якія адзначылі, што цяпер яны зноў бачаць небяспечныя прыкметы для сусветнай эканомікі.

Так, амерыканскі фінансавы аналітык Гэры Шылінг заявіў, што баіцца новай крызіснай хвалі. Ён параўноўвае цяперашнюю сітуацыю з 2008 годам: зноў перагрэтыя рынкі, рост спекуляцый і рэкордныя дзяржаўныя даўгі. «Сітуацыя заблытаная. Я не разумею, у якім напрамку рухаюцца фінансавыя рынкі. Верагоднасць фінансавага крызісу небяспечна высокая», — сказаў ён.

Фінансавы аналітык Мэрэд Уітні, якую называюць «аракулам Уол-стрыт», лічыць, што спад ужо пачаўся. Паводле яе слоў, рэальная эканоміка слабейшая, чым паказваюць афіцыйныя даныя, а многія амерыканцы жывуць у даўгах.

Аўтар знакамітай кнігі «Чорны лебедзь» Насім Талеб папярэджвае пра «такую ж небяспечную сітуацыю, як у 2008 годзе», але з іншай структурай пагроз. «Тады даўгі былі ў банкаў, сёння — у дзяржаў», — адзначае ён.

Найбольш рэзка выказаліся аб сітуацыі аналітыкі, якія бачаць «самы вялікі крэдытны пузыр у гісторыі» ў ажыятажы вакол штучнага інтэлекту. Амерыканскі інвестар Майкл Б’юры прагназуе падзенне гэтага рынку і раіць не інвеставаць грошы ў буйныя тэхналагічныя кампаніі.

«Нягледзячы на разыходжанні ў дэталях, усе эксперты сыходзяцца ў адным: спалучэнне велізарных даўгоў, перагрэтых тэхналагічных акцый і разрыву паміж біржавай ацэнкай і рэальнай эканомікай робіць сусветныя рынкі вельмі ўразлівымі», — рэзюмуе выданне.