«Таццяна Іванаўна паступіла да нас на спецыяльнасць «Музычнае мастацтва эстрады» на завочную форму навучання. Тэрмін навучання складае пяць гадоў. Падрыхтоўка па гэтай спецыяльнасці ажыццяўляецца кафедрай мастацкай творчасці і прадзюсарства. Па заканчэнні навучання ёй будзе прысвоена кваліфікацыя «артыст, кіраўнік творчага калектыву, выкладчык», — расказаў Уладзіслаў Кадзіра. 

У лістападзе спявачка падала дакументы ў ВНУ і была залічана на першы курс. «Замежныя грамадзяне паступаюць па сумоўі на веданне рускай мовы і гісторыі. Уступных экзаменаў у гэтым выпадку не прадугледжана. Паступленне на завочную форму навучання было абавязковай умовай, бо ў яе вельмі шчыльны гастрольны графік, часта яна не зможа прыязджаць, але два разы на год на сесіях абяцала быць як старанная студэнтка», — праінфармаваў першы прарэктар.

Таццяна Буланава будзе вучыццa па індывідуальным плане навучання. «Некаторыя дысцыпліны студэнтка будзе вывучаць самастойна, гэта значыць будзе ісці індывідуалізацыя асваення зместу адукацыйнай праграмы, але з абавязковай здачай усіх курсавых работ, рэфератаў, залікаў і экзаменаў. Я пытаўся ў Таццяны Іванаўны, чаму яна выбрала нашу ВНУ. Яна прызналася, што доўга прыглядалася да нашай установы адукацыі. Ёй вельмі падабаецца наш склад выкладчыкаў, у нас вучаць вядучыя спецыялісты ў сферы эстраднага мастацтва, вядомыя музыканты, выканаўцы, кампазітары, аранжыроўшчыкі. Сярод выкладчыкаў у нас народны артыст Рэспублікі Беларусь Мікалай Скорыкаў. Таксама яна знаёмілася з нашымі вядомымі выпускнікамі, якіх у нас шмат, напрыклад, пераможца „Славянскага базара“ ў 2022 годзе Ганна Трубяцкая, беларуская спявачка Аляксандра Гайдук. Пасля гэтага Таццяна Буланава прыняла рашэнне паступіць да нас», — дадаў Уладзіслаў Кадзіра.