Аднак, як адзначыла намеснік начальніка ўпраўлення арганізацыі і матывацыі працы Міністэрства працы і сацыяльнай абароны Алена ПАШЧАНКА, з вышэйназванай колькасці студэнтаў далёка не ўсе працуюць па сваёй спецыяльнасці:

— Таму наша галоўная задача — дапамагчы дзецям максімальна атрымаць вопыт і веды менавіта па профільных кірунках.

Ёсць з чаго выбіраць

Сёння ў краіне каля 39 тысяч маладых спецыялістаў шукаюць працу. Пры гэтым агульная колькасць вакансій складае прыкладна 138 тысяч.

— Атрымліваецца, сярод гэтых 39 тысяч ёсць рэальныя кандыдаты, якім мы здольныя даць працоўныя месцы, — разважае Алена Аляксандраўна

Па яе словах, сучаснай моладзі недастаткова лекцыйных ведаў. Ім трэба дзейнічаць, спрабаваць сябе ў спецыяльнасці, бачыць і аналізаваць вынік і прымяняць веды на практыцы — гэта і ёсць адаптацыя да будучай працы і атрымання практыка-арыентаванай адукацыі.

— Гаворка ідзе аб самых розных сферах: творчасць, будаўніцтва, жыллёва-камунальная гаспадарка, сельская гаспадарка, адукацыя, — пералічвае прадстаўнік Мінпрацы.

Важна, што юнакі і дзяўчаты будуць працаваць пад кіраўніцтвам вопытных настаўнікаў.

— У кваліфікацыйных характарыстыках адпаведных пасад будзе абавязкова замацавана: студэнты пасля другога ці трэцяга курса — у залежнасці ад спецыфікі — выконваюць свае абавязкі выключна пад кантролем работнікаў з больш высокім стажам і ўзроўнем кваліфікацыі альбо пад кіраўніцтвам дырэктара, — удакладняе Алена Аляксандраўна. — Паўтару, гэта будзе абавязкова адлюстравана ў кваліфікацыйных характарыстыках.

Плануем кадравы патэнцыял

Начальнік галоўнага ўпраўлення прафесійнай адукацыі Міністэрства адукацыі Сяргей ПІШЧОЎ перакананы, што, праходзячы практыку падчас вучобы, студэнты набываюць дадатковыя кампетэнцыі. Гэта дазваляе ім хутчэй адаптавацца на першым працоўным месцы і лепш даведацца пра кампанію, у якой яны могуць працаўладкавацца ў будучыні:

— Таму першыя крокі па рэалізацыі праекта студэнты зробяць гэтым летам, падчас вытворчай практыкі. Для гэтага ўжо вызначаны пералік прафесій, на якія змогуць працаўладкоўвацца студэнты, унесены змяненні ў Адзіны тарыфна-кваліфікацыйны даведнік работ і прафесій рабочых — каб у наймальнікаў з’явілася магчымасць афіцыйна прымаць студэнтаў на адпаведныя пасады.

Цяпер універсітэты сумесна з работадаўцамі, камітэтамі па працы і Мінпрацы арганізуюць інфармаванне студэнтаў аб новых магчымасцях.

— У ВНУ прызначаюць адказных за рэалізацыю праекта і дапрацоўваюць сайты, тэлеграм-каналы і іншыя інфармацыйныя рэсурсы, дзе будзе публікавацца інфармацыя для студэнтаў, — гаворыць Сяргей Пішчоў. — Для ўдзельнікаў праграмы таксама падрыхтуюць падрабязны алгарытм дзеянняў з пералікам неабходных дакументаў і пакрокавымі інструкцыямі па працаўладкаванні. А падчас чэрвеньскіх кірмашоў вакансій будучым спецыялістам раскажуць аб умовах працаўладкавання, даступных вакансіях і асаблівасцях працы на прадпрыемствах.

Па словах Сяргея Пішчова, акцэнт сістэмы адукацыі сёння засяроджаны на стратэгічным планаванні кадравага патэнцыялу краіны і павышэнні ролі ўзаемадзеяння паміж ВНУ і прадпрыемствамі:

— Сёлета беларускія ўніверсітэты гатовыя прыняць каля 6,3 тысячы абітурыентаў на ўмовах мэтавай падрыхтоўкі. Гэта траекторыя ў звязку з працаўладкаваннем студэнтаў па спецыяльнасці падчас вучобы дазваляе адначасова скараціць колькасць вакансій на прадпрыемствах і даць студэнтам рэальны практычны вопыт.
У цэлым, заключыў начальнік галоўнага ўпраўлення Мінадукацыі, праца вядзецца актыўная. Акрамя ўнясення змяненняў у кваліфікацыйныя даведнікі і прафесійныя стандарты, ведамства фарміруе пералік спецыяльнасцяў па кожнай ВНУ. Ствараюцца пляцоўкі для ўзаемадзеяння, праводзяцца сустрэчы з наймальнікамі. Вядзецца маштабная інфармацыйная праца, каб кожны ведаў і мог скарыстацца гэтай ініцыятывай.

У сваю чаргу Алена Пашчанка адзначыла, што патрэба ў спецыялістах існуе не толькі на поўны працоўны дзень — маюцца вакансіі на 0,25, 0,5 і 0,75 штатнай адзінкі. І гэта, лічыць яна, прынцыпова важна — працаўладкаванне не павінна перашкаджаць студэнту атрымліваць адукацыю або ўплываць на яго якасць.

Алена ВІНАГРАДАВА