Тэхналогія будаўніцтва егіпецкіх пірамід доўгі час выклікала пытанні ў вучоных. Не захавалася ніякіх гістарычных крыніц, якія апісваюць, як людзі маглі падымаць і збіраць масіўныя каменныя блокі. У ходзе новага даследавання вучоныя з Нью-Ёрка прыйшлі да высновы, што піраміда Хеопса была ўзведзена з дапамогай сістэмы проціваг і механізмаў, падобных на шківы. Яны былі схаваныя ўнутры канструкцыі і дазвалялі ўкладваць масіўныя блокі за лічаныя хвіліны, паведаміла БелТА.
Вучоныя ўказалі на архітэктурныя асаблівасці ўнутры піраміды, якія пацвярджаюць іх здагадку. Так, вялікая галерэя і ўзыходзячы праход маглі адыграць ролю нахільных пандусаў, дзе ўстанаўлівалі процівагу. Невялікая камера, якая, як лічылася, служыла для абароны ад уварвання, насамрэч была часткай механізму для пад'ёму цяжараў вагой да 60 т.
На сценах унутраных камер піраміды захаваліся драпіны і сляды зносу. Верагодна, яны засталіся ад слізгання будаўнічых механізмаў.
Аўтары навуковай працы заявілі, што Вялікая піраміда была пабудавана знутры, пачынаючы з унутранай часткі. Па меры росту збудавання для пад'ёму камянёў выкарыстоўвалі скрытыя сістэмы блокаў.
Вялікая піраміда Хеопса, найстарэйшая і найбуйнейшая з пірамід Гізы, была пабудавана як пахавальня фараона каля 2560 года да нашай эры. Ні мумія фараона, ні пахавальныя скарбы так і не былі знойдзены. Піраміда на працягу тысячагоддзяў заставалася самым высокім збудаваннем у свеце і адзіным цудам старажытнасці, які дайшоў да сучаснай эпохі.
