У Кафедральны касцёл Святога Францішка Ксаверыя ў Гродне Віфлеемскі агонь будзе ўрачыста дастаўлены 18 снежня ў 17:00, а на наступны дзень, 19 снежня, — у Архікафедральны касцёл Імя Прасвятой Дзевы Марыі ў Мінску (у 18:30). У суботу, 20 снежня, агонь прыбудзе ў Віцебскі кафедральны касцёл Ісуса Міласэрнага (у 17:30), у нядзелю, 21 снежня, — у Пінскі касцёл Унебаўзяцця Прасвятой Дзевы Марыі (у 11:15).

У гэтым годзе Віфлеемскі агонь плануецца даставіць больш чым у 150 рымска‑каталіцкіх і грэка‑каталіцкіх парафій. Карта з графікам прыбыцця агню ў прыходы краіны размешчана на партале Рымска‑каталіцкай царквы ў Беларусі.

Упершыню ў Беларусь Віфлеемскі агонь афіцыйна быў дастаўлены ў 1998 годзе. Галоўную ролю ў яго распаўсюджванні сярод каталіцкіх парафій і ўстаноў адыгрываюць каталіцкія скаўткі і скаўты, якія займаюцца гэтым з 2008 года. Сёлета далучацца скаўты з Віцебска, Гродна, Жодзіна, Івянца, Мінска і Полацка.

Гісторыя Віфлеемскага агню міру пачалася ў Аўстрыі ў 1986 годзе, калі супрацоўнікі мясцовай радыёкампаніі ÖRF вырашылі падзякаваць спонсарам дабрачыннай акцыі «Святло ў цемры», падзяліўшыся з імі святлом з Віфлеема. Першапачаткова ініцыятыва не планавалася як штогадовая, але з часам яна знайшла водгук у сэрцах людзей і цяпер з’яўляецца міжнароднай традыцыяй.

У 1989 годзе скаўцкі рух упершыню прыняў актыўны ўдзел у кампаніі па распаўсюджванні Віфлеемскага агню. І калі спачатку гэта былі толькі скаўты з Аўстрыі, то з часам ініцыятыва распаўсюдзілася на іншыя краіны.

Віфлеемскі агонь запальваецца дзіцем або падлеткам ад адной з 15 незгасальных лямпаў, размешчаных непасрэдна ў Гроце Раства ў Віфлееме. Пасля гэтага святло дастаўляецца ў Аўстрыю спецыяльным авіярэйсам, адкуль ён распаўсюджваецца па розных краінах свету.