Брэст засыпала снегам. На дапамогу камунальным службам прыйшлі ў тым ліку вайскоўцы. Яны разам прыбралі тэрыторыі сваіх вайсковых часцей і прылеглыя ўчасткі. Затым перамясціліся да сацыяльных устаноў. Так, вайскоўцы прыбіраюць снег паблізу Брэсцкай абласной клінічнай бальніцы, гарадскіх паліклінік № 3 і № 5, дзіцячай гарадской паліклінікі № 3, дзіцячых садкоў № 9 і № 10, гімназіі № 6. Таксама расчышчаюць прыпынкі грамадскага транспарту.

«Армія Беларусі ніколі не заставалася ў баку ў выпадку неабходнасці вырашэння ўзніклых праблем, у тым ліку і прыроднага характару. У сувязі з моцнымі снегападамі вайскоўцы Брэсцкага гарнізона актыўна ўключыліся ў ліквідацыю наступстваў непагадзі», — адзначылі ў абласным ваенкамаце.

У цэлым снег на вуліцах Брэста прыбіраюць больш за 100 адзінак спецыяльнай тэхнікі. Плячо ЖКГ падставілі каля дзесяці арганізацый горада, кожная з якіх дала па некалькі машын. Таксама работнікі прадпрыемстваў у сувязі з планам «Надвор’е», уведзеным на ўсёй Брэсцкай вобласці, займаюцца расчысткай замацаваных тэрыторый. Не засталіся ўбаку і самі брэстаўчане.

«Увечары 8 студзеня пасля першай хвалі снегападу жыхары некаторых шматпавярховых дамоў выйшлі пачысціць выхады з пад’ездаў, пешаходныя дарожкі. Па ўсіх мікрараёнах актыўна ўдзельнічаюць кааператыўныя дамы. Цяпер ужо трэцяя хваля снегу (невялікага). З улікам прагнозу надвор’я, чакаем, што бліжэй да вечара ён спыніцца. Вярнуўшыся з працы, людзі могуць дапамагчы камунальным службам і сабе, каб забяспечыць бяспечныя ўмовы перамяшчэння ў дварах», — дадаў генеральны дырэктар Брэсцкай гарадской ЖКГ Андрэй Гашаў.