Верасень у Беларусі абвешчаны месяцам экалагічнага турызму. Плануецца правесці звыш 120 тэматычных мерапрыемстваў: прэс-канферэнцыі, семінары, круглыя сталы, экскурсіі, выставы, майстар-класы. Падрабязная інфармацыя пра падзеі размешчана на сайце Нацыянальнага агенцтва па турызме. Усе рэгіёны прапануюць варыянты цікавага вольнага часу на выходныя дні. Напрыклад, 27-28 верасня можна адправіцца ў Белавежскую пушчу на экалагічны фестываль «Грыбныя выхадныя».

У краіне створана больш за 200 экатроп, толькі ў Мінску іх налічваецца 24. Актыўна гэтая праца вядзецца з 2016 года, пастаянна адкрываюцца новыя маршруты. 

Экалагічныя фестывалі і аб’екты ўключаюцца ў камбінаваныя туры. На рэгулярнай аснове праводзяцца рэкламныя туры, адукацыйныя семінары. 

Перспектывы развіцця экалагічных маршрутаў плануецца абмеркаваць 19 верасня на выязным пасяджэнні профільнай рабочай групы. 

Ірына Варановіч праінфармавала, што ў прошлым годзе адбылося 254 мерапрыемствы, прысвечаных месяцу экалагічнага турызму. У іх прынялі ўдзел каля 12 тыс. чалавек. Па экскурсіях экалагічнай тэматыкі ў 2024 годзе дзяржаўную атэстацыю прайшлі больш за 30 экскурсаводаў і гідаў-перакладчыкаў.

«Бачым зацікаўленасць, каб экскурсіі праходзілі на годным узроўні», — сказала дырэктар дэпартамента.

Нацыянальным агенцтвам па турызме распрацоўваюцца метадычныя дапаможнікі, праводзяцца маркетынгавыя даследаванні, адно з якіх тычылася ацэнкі экалагічных сцежак. У Дзяржаўную праграму «Беларусь гасцінная» ўключаны 12 аб’ектаў экалагічнай накіраванасці. Асаблівая ўвага надаецца Віцебскаму Паазер’ю — край становіцца асабліва прывабным у перыяд летняга адпачынку.

Штогод праводзіцца рэспубліканская турыстычная акцыя «Вандруй. Адчуй. Натхняйся», дзе ў тым ліку прадстаўлены экамаршруты. Адна з намінацый рэспубліканскага конкурсу «Пазнай Беларусі» — «Аб’ект экатурызму». У 2024 годзе было пададзена 76 заявак (для параўнання: у 2023-м — 27, у 2022-м — 17). Лаўрэатам стаў Бярэзінскі біясферны запаведнік, дыпламантамі — Рэспубліканскі ландшафтны заказнік «Азёры» і Рэспубліканскі ландшафтны заказнік «Асвейскі». Граматамі ўзнагароджаны заказнік рэспубліканскага значэння «Выганашчанскае», экапарк «Акварэль», Нацыянальны парк «Браслаўскія азёры».