У 37-ю гадавіну вываду савецкіх войск з Афганістана да гэтага памятнага месца ўшанаваць памяць загінулых і ўскласці кветкі да манументу прыйшлі прадстаўнікі органаў дзяржашнага кіравання, міністэрстваў і ўстаноў, бацькі, удовы, сем’і загінулых салдат, ветэраны-афганцы, сувораўцы, кадэты і проста неабыякавыя гараджане.

Падчас мітынгу ў гонар воінаў-інтэрнацыяналістаў былыя ўдзельнікі баявых дзеянняў у Афганістане сустрэліся з баявымі таварышамі, успомнілі сяброў, якія загінулі, выконваючы баявы загад Радзімы, і тых, хто сышоў з жыцця ў мірны час. 

З 1979-1989 у Афганістане вялі барацьбу каля 30 тысяч нашых беларусаў. Манументы і помнікі воінам-інтэрнацыяналістам устаноўлены ў многіх гарадах краіны, у гонар герояў названыя беларускія вуліцы і школы. Гэта адзначыў у сваім выступленні Дзяржаўны сакратар Савета Бяспекі Аляксандр Вальфовіч.

«На фоне халоднай вайны, глабальнага супрацьстаяння ўвод савецкіх войскаў у Афганістан быў выкліканы шэрагам геапалітычных, стратэгічных і палітычных фактараў. Аднак ніхто тады не думаў, што гэта вайна зацягнецца на доўгіх дзесяць гадоў», — заявіў Дзяржаўны сакратар Савета Бяспекі Беларусі.

«Сёння мы сабраліся тут, каб аддаць даніну павагі і ўшанаваць памяць воінаў-інтэрнацыяналістаў, удзельнікаў афганскай вайны, удзельнікаў усіх лакальных канфліктаў», — сказаў ён.

Аляксандр Вальфовіч дадаў, што за час гэтай вайны больш за 620 тысяч савецкіх грамадзян прайшлі школу мужнасці, засталіся вернымі сваёй прысязе, выканалі свой доўг, дапамагаючы афганскаму народу адстаяць сваю свабоду і незалежнасць. 

«Падчас баявых дзеянняў савецкія грамадзяне выконвалі важную місію — будавалі школы, бальніцы, прадпрыемствы, дапамагалі ў развіцці народнай гаспадаркі. Сёння свет, на жаль, не стаў прасцей. Геапалітычнае становішча яшчэ больш вострае і складанае, чым тады», — сказаў Аляксандр Вальфовіч.

Паводле яго слоў, тыя, хто ігнаруе ўрокі гісторыі, рызыкуюць паўтарыць страшныя старонкі. «Больш за 60 канфліктаў рознай інтэнсіўнасці праходзіць у свеце. Напэўна, самы яркі канфлікт — каля граніц Рэспублікі Беларусь, на тэрыторыі Украіны», — сказаў ён.

«Беларускі народ не хоча паўтарыць тое, што было больш за 80 гадоў таму, калі змагаліся нашы дзяды і прадзеды, адстойваючы і абараняючы свет ад нацызму і фашызму, — падкрэсліў Аляксандр Вальфовіч. — Мы паважаем нашых дзядоў і прадзедаў, мы паважаем воінаў-інтэрнацыяналістаў, якія выконвалі высакародную місію. Таму пытанні гістарычнай памяці ў нашай краіне аднесены да нацыянальных інтарэсаў».

У каментарыі журналістам дзяржаўны сакратар Савета бяспекі адзначыў важную задачу — на прыкладзе такіх падзей выхоўваць маладое пакаленне, каб моладзь ведала: самае дарагое — мір і бяспека. Таму сёння ў Беларусі прымаюцца ўсе меры, каб захаваць мірнае і бяспечнае неба над тэрыторыяй краіны.

Удзельнікі мерапрыемства ўшанавалі памяць воінаў-інтэрнацыяналістаў хвілінай маўчання. 

Чытайце таксама: Якія льготы і выплаты прадугледжаны заканадаўствам для воінаў-інтэрнацыяналістаў.

Надзея ЗУЕВА

Фота БелТА і К. Ліннік

Памяць воінаў-інтэрнацыяналістаў ушанавалі ў Гомелі

Фота Андрэя Феакцістава

«У іх лёсе была вайна». Памяць воінаў-інтэрнацыяналістаў ушанавалі на мітынгу-рэквіеме ў Гродне

У скверы памяці воінаў-афганцаў у Гродне адбыўся мітынг-рэквіем «У іх лёсе была вайна», перадае БелТА.

Каля мемарыяла воінам-інтэрнацыяналістам сабраліся ветэраны баявых дзеянняў, кіраўніцтва вобласці і горада, парламентарыі, святары, сем’і ўдзельнікаў лакальных войнаў, воінскія падраздзяленні, прадстаўнікі працоўных калектываў і грамадскіх арганізацый, моладзь. Прысутныя пацвердзілі, што дата 15 лютага аб’ядноўвае ўсіх, хто ў розныя гады выконваў свой воінскі абавязак за межамі Радзімы. Лампадкі, чырвоныя гваздзікі і вянкі сталі сімваламі памяці пра тых, хто загінуў на той вайне.

Удзельнікі мітынгу-рэквіема ўшанавалі памяць землякоў, якія не вярнуліся з ваенных канфліктаў. Да падножжа манумента ляглі жывыя кветкі і вянкі.

«Гэта сапраўды гераічныя людз і- тыя, хто не вярнуўся, і тыя, каго сёння побач з намі. Наша галоўная задача — акружыць клопатам ветэранаў, воінаў-інтэрнацыяналістаў і іх сем’і, якія не дачакаліся сваіх сыноў, дзядоў і бацькоў з гарачых кропак. Мы павінны памятаць, шанаваць іх памяць і ставіцца да гэтых падзей з павагай. Дзякуй Вам за тое, што вы ёсць, за вашу актыўную жыццёвую пазіцыю, за выхаванне нашай моладзі», — сказаў старшыня Гродзенскага гарвыканкама Андрэй Хмель, звяртаючыся да ўдзельнікаў мітынгу.

Памяць загінулых у Афганістане ўшанавалі ў Віцебску 

У Віцебску прайшоў мітынг, прысвечаны Дню памяці воінаў-інтэрнацыяналістаў і 37-й гадавіне вываду савецкіх войск з Афганістана, а таксама цырымонія ўскладання вянкоў і кветак да памятнага знака воінам-інтэрнацыяналістам «Боль». У мерапрыемствах прынялі ўдзел кіраўнікі і прадстаўнікі мясцовых органаў улады, дэпутаты, воіны-афганцы, ветэраны лакальных войн, сем’і загінулых, прадстаўнікі працоўных калектываў і грамадскіх арганізацый абласнога цэнтра.

У Магілёве 15 лютага прайшоў тэатралізаваны мітынг, прысвечаны гадавіне вываду савецкіх войск з Афганістана

У Магілёве 15 лютага прайшоў тэатралізаваны мітынг, прысвечаны 37-й гадавіне вываду савецкіх войскаў з Афганістана. Каля помніка на набярэжнай Дняпра сабраліся прадстаўнікі абласнога і гарадскога выканаўчых камітэтаў, упраўленняў і ведамстваў, сілавых структур, дэпутаты, воіны-інтэрнацыяналісты, іх родныя і блізкія, гараджане і моладзь, перадае БелТА.