Паводле яго слоў, адкрыццё 30 гадоў таму з удзелам Прэзідэнта Аляксандра Лукашэнкі мемарыяльнага комплексу стала знакавай падзеяй. «Ужо тады кіраўнік дзяржавы разумеў, што стварэнне такіх памятных мясцін мае важнае значэнне для ўстойлівага развіцця дзяржавы», — сказаў Аляксандр Вальфовіч. Той час быў цяжкі для ўсіх рэспублік былога Савецкага Саюза, адзначыў дзяржсакратар Савета Бяспекі. Тым не менш Прэзідэнт прыняў абсалютна правільнае рашэнне — увекавечыць памяць аб тых, хто выканаў свой інтэрнацыянальны абавязак, быў верны сваёй воінскай прысязе.

«Гэта месца — мост паміж сённяшняй нашай краінай і гераічнымі старонкамі нашага народа. Яно сведчыць аб непарыўнай сувязі пакаленняў. Гэта месца сведчыць аб захаванні лепшых беларускіх традыцый», — адзначыў Аляксандр Вальфовіч.

Мемарыяльны комплекс воінам-інтэрнацыяналістам, якія загінулі ў Афганістане, «Востраў мужнасці і смутку» — яшчэ і сакральнае месца, дадаў ён. Яно сведчыць аб мужнасці і доблесці хлопцаў, якія не вярнуліся з той вайны, а таксама сімвалізуе ўдзячнасць усяго беларускага народа маці, жонкам, блізкім і родным тых хлопцаў, якія выконвалі інтэрнацыянальны абавязак.«Гэта месца сведчыць аб удзячнасці вам, хто застаўся жывым, прайшоў цяжкімі дарогамі Афганістана, вярнуўся і прадаўжае выконваць задачы па выхаванні пакаленняў», — сказаў дзяржаўны сакратар Савета Бяспекі, звяртаючыся да воінаў-інтэрнацыяналістаў, якія, паводле яго слоў, застаюцца ў страі і робяць гэта добрасумленна, як сапраўдныя патрыёты сваёй дзяржавы. Аляксандр Вальфовіч падкрэсліў, што пытанні гістарычнай памяці ў Беларусі аднесены да нацыянальных інтарэсаў, і гэта абсалютна правільна. Бо той, хто забыў гісторыю і сваіх продкаў, іх гераічныя ўчынкі, не можа глядзець упэўнена ў будучыню.

«Сёння мір настолькі крохкі. І помнікі, якія ёсць у нашай краіне, у тым ліку гэты, сведчаць аб тым, што мір і бяспека — галоўныя крытэрыі ўстойлівага працвітання дзяржавы і жыцця любога грамадства, — сказаў ён. — Пакуль мы прыходзім да гэтых помнікаў, пакуль помнім сваіх гераічных продкаў, у тым ліку тых хлопцаў, нашых грамадзян, якія загінулі, выконваючы інтэрнацыянальны абавязак, пакуль прыводзім сюды сваіх дзяцей, наша дзяржава будзе ўпэўнена глядзець у будучыню». Дзяржсакратар Савета Бяспекі запэўніў, што сумеснымі намаганнямі будзе забяспечана самае галоўнае — бяспека і мірнае неба над краінай.

Фота БелТА і Віктара ІВАНЧЫКАВА