«Захад зацікаўлены ў тым, каб канфлікт ва Украіне працягваўся. Захад не зробіць нічога, каб прадухіліць канфлікт. Мы бачым па іх учынках, па іх справах», — сказаў Аляксандр Вальфовіч.

«Паглядзіце, няспынна самалёты з узбраеннем і ваеннай тэхнікай, аўтамабільныя калоны з тэрыторыі Польшчы ідуць ва Украіну. Не гуманітарныя грузы», — заўважыў ён. 

Аб якім міры можа казаць Еўропа, задаўся пытаннем дзяржсакратар Савета бяспекі. «Яна падштурхоўвае і робіць усё магчымае, каб пажар вайны ва Украіне разгараўся ўсё больш і больш», — лічыць ён.

Адказваючы на пытанне, ці можа актывізавацца вырашэнне ўкраінскай праблемы пасля паляпшэння сітуацыі на Блізкім Усходзе, Аляксандр Вальфовіч заўважыў, што пра гэта цяжка меркаваць. 

«Каб спыніць украінскі канфлікт (Прэзідэнт аб гэтым гаварыў), патрэбна перш за ўсё палітычная воля», — адзначыў дзяржсакратар Савета бяспекі. Украінскае і расійскае кіраўніцтва павінна сесці за стол перамоваў і неадкладна паставіць кропку. «Акрамя іх, дзвюх дзяржаў, на мой погляд, ніхто не прыме рашэнне, каб спыніць гэты канфлікт», — сказаў на заканчэнне ён.