— Гэта велізарная перамога, гінеколагі нашай краіны радуюцца, анколагі — ужо тым больш. Таму што ў цяперашні час першасная прафілактыка раку шыйкі маткі — гэта самая надзейная мера па папярэджанні раку. А першасная прафілактыка — гэта і ёсць вакцынацыя дзяўчынак да пачатку палавога жыцця, калі вакцына будзе максімальна эфектыўная і карысная.
У Беларусі бясплатна вакцынуюць двухвалентнай вакцынай у 11 гадоў з розніцай у паўгода. Гэта значыць ставяць дзве дозы з інтэрвалам у шэсць месяцаў. Такім чынам нашы дзяўчынкі будуць абаронены ад двух самых небяспечных тыпаў ВПЧ высокай анкагеннай рызыкі, 16-га і 18-га. Яны адказныя за 70 % выпадкаў раку шыйкі маткі ў жанчын.
Вакцынацыя — гэта самая эфектыўная стратэгія ў папярэджанні раку шыйкі маткі. Яна досыць бяспечная, вывучана і ў шэрагу краін выкарыстоўваецца каля 20 гадоў. Напрыклад, вопыт Аўстраліі: з 2007 года вакцынацыя там праводзіцца і ўкаранёна ў нацыянальны каляндар прышчэпак. Спачатку для дзяўчынак, крыху пазней — для хлапчукоў. І сапраўды, Аўстралія — адна з першых краін, хто заяўляе, што, магчыма, яны перамогуць праблему раку шыйкі маткі. Таму радасна, што ў нашай краіне вакцынацыя таксама даступная і праводзіцца бясплатна.
— Калі да вас звяртаюцца мамы дзяўчынак, іх нешта хвалюе? Вакцына для нас новая, якія пытанні задаюць, чаго асцерагаюцца?
— На жаль, чамусьці асцерагаюцца бясплоднасці, якая нібыта можа здарыцца пасля вакцынацыі. Абсалютна абвергнуты ў навуковым свеце міф. З пункту гледжання навукі гэта нават складана каменціраваць... У вакцыне па факце і не вірус, а толькі яго часцінка, якая ў арганізме не зможа стаць вірусам. Проста ў адказ на гэтую часцінку, абалонку, будуць выпрацоўвацца антыцелы, якія пры інфікаванні сапраўдным вірусам будуць яму процідзейнічаць.
У абалонцы няма нічога такога, як і ў дапаможных кампанентах. Гэта значыць, у складзе вакцыны няма ніякага субстрата, які мог бы негатыўна адбіцца на рэпрадуктыўным патэнцыяле будучай мамы.
Тут я прыводжу ў прыклад бацькам тую ж Аўстралію. Там вакцынацыя праводзіцца 20 гадоў, гэта значыць першыя прышчэпленыя ўжо ў росквіце рэпрадуктыўнага ўзросту. Можна паглядзець статыстыку па захворванні і колькасці насельніцтва, яна адкрыта ў многіх краін: мы не ўбачым там «змяншэнне» аўстралійцаў.
Для нашай краіны гэта нешта новае, многіх палохае, што раней пра гэта не казалі, але раптам пачалі. Напэўна, у краінах, у якіх укаранялі першымі, людзям было страшней. А нам цяпер ёсць на каго паглядзець. Галоўнае, не хаваць галаву ў пясок і не спасылацца ва ўсім на «інтрыгі фармы». Тая ж Аўстралія, у Фінляндыі вопыт каля 20 гадоў. Мы бачым, што яны практычна вырашылі праблему раку шыйкі маткі, і пры гэтым колькасць насельніцтва не пацярпела. Ва ўсім свеце ўведзена шмат мільёнаў доз вакцыны ад ВПЧ, і яны не дэманструюць аддаленых найцяжэйшых наступстваў. Наадварот, сёння вакцына прызнана Сусветнай арганізацыяй аховы здароўя бяспечнай.
Паўтаруся, для нашай краіны бясплатная вакцынацыя ад ВПЧ — гэта проста шчасце, якога мы доўга чакалі. Вельмі б хацелася, каб мамы слухаліся ўрачоў і не адмаўляліся ад вакцынацыі з-за ўяўных страхаў.
