Ці задумваліся вы, чым прываблівае наша зямля? Якія эмоцыі і асацыяцыі павінна выклікаць Беларусь у вачах падарожнікаў з усяго свету? Хтосьці адзначыць багатую прыроду. Іншы адкрые для сябе нашу гістарычную спадчыну з драматычнымі старонкамі. Другі зверне ўвагу на гасціннасць людзей, чысціню і спакой. А цяпер усё гэта трэба аб’яднаць у адзіны брэнд, які ўвойдзе ў свядомасць і запомніцца надоўга, каб яго хацелася павезці з сабой дадому — напрыклад, на сувенірах, цішотках, чамаданах... Зубр, бусел, васілёк, слуцкія паясы, Брэсцкая крэпасць, нашыя замкі і палацы сапраўды кранаюць. Але ніводзін з іх не здолеў стаць тым сімвалам, які беспамылкова счытвалі б ва ўсім свеце, разумеючы, пра якую краіну ідзе гаворка. Таму і вырашылі абвясціць конкурс, у якім будзе знойдзены сапраўдны сімвал, адлюстраваны ў слогане і лагатыпе. Кірыл Машарскі, дырэктар Нацыянальнага агенцтва па турызме, адзначыў:

— Паспяховыя турыстычныя брэнды прадаюць не славутасці, а эмоцыі, уражанні, лад жыцця. Напрыклад, Паўночная Карэя асацыюецца з інавацыямі, Швейцарыя — з раскошай, Францыя — з рамантыкай, Германія — з якасцю. Краіны не імкнуцца распавесці пра сябе ўсё і адразу, яны выбіраюць адну ідэю і гадамі яе прасоўваюць. Бо чым больш шырока пазіцыянаваць сябе, тым больш размыты вобраз атрымліваецца. А нам трэба коратка і дакладна перадаць усю філасофію беларускага турызму, каб пасля выбудоўваць вакол яе пэўную сістэму са славутасцямі і турыстычнымі прадуктамі, якія будуць прывабныя для іншых.

Між іншым, турызм у нас і цяпер развіваецца не толькі за кошт прытоку гасцей з Расійскай Федэрацыі, але і з блізкіх нам краін Еўропы — людзі разумеюць, куды яны едуць і чаму. Ёсць турысты, якія абіраюць Беларусь для падарожжа свядома. Але колькі яшчэ тых, хто не адкрыў яе для сябе, для каго яна застаецца таямніцай Еўропы. Вось толькі як гэта выкласці ў ёмістай і кароткай фармулёўцы? Рэктар Беларускага дзяржаўнага ўніверсітэта культуры і мастацтваў Наталля Карчэўская не сумняваецца, што ў нашай краіне ёсць крэатыўная моладзь, якая можа прапанаваць ідэю і абгрунтаваць яе. Ужо былі прыклады, калі маладыя людзі паспяхова прапаноўвалі рашэнні для крэатыўнай індустрыі. І ў турызме, напэўна, цяпер патрэбны зусім іншы погляд на тое, як пазіцыянаваць нашу краіну. А калі ёсць канкрэтная задача, то будуць ахвотныя яе вырашыць.

Паўдзельнічаць у адкрытым рэспубліканскім конкурсе «Вобраз Беларусі. Позірк і адкрыццё» могуць усе, хто пажадае: прафесійныя дызайнеры, мастакі, маркетолагі, студэнты, прадстаўнікі турыстычнай індустрыі, творчыя калектывы і проста неабыякавыя грамадзяне. Найлепшыя аўтары атрымаюць грашовыя ўзнагароды, якія абяцае генеральны спонсар «АСБ Беларусбанк». Прызавы фонд складае 22 000 рублёў, з іх 10 000 атрымае той, хто зойме першае месца. Заяўкі прымаюцца да 1 лістапада 2026 года, ужо праз два тыдні журы павінна выбраць 20 найлепшых канцэпцый для ўдзелу ў адкрытым анлайн-галасаванні. А па яго выніках у суме з адзнакамі журы да 20 снежня павінны вызначыць пераможцаў.

Старшыня праўлення Рэспубліканскага саюза турыстычнай індустрыі Філіп Гулы лічыць, што пазнавальныя і яркія вобразы павінны стаць магутным інструментам, які дапаможа айчыннаму бізнесу больш эфектыўна прасоўваць турыстычны патэнцыял Беларусі.

Ларыса ЦІМОШЫК