Лічаныя гадзіны засталіся да закрыцця Польшчай мяжы з Беларуссю. Тыя, хто ўехаў у нашу краіну, не хаваюць аблягчэння, што своечасова паспелі, перадае карэспандэнт БелТА.

Брэстаўчанка Алена выдыхнула, калі прайшла кантроль на беларускім баку. «У палякаў мы пастаялі, хаця былі першымі. Яны гадзіну проста не выходзілі. Калі б яны працавалі, прайшлі б хутчэй. Не ведаю, можа, дождж ім перашкаджаў. Беларусы малайцы, усё хутка», — падзялілася ўражаннямі жанчына.

Навіна аб закрыцці польскай мяжы прымусіла яе тэрмінова мяняць планы і вяртацца дадому. «Я ездзіла да дачкі. Павінна была 15 верасня вярнуцца. Экстранна білеты памянялі і ўзялі на аўтобус. Рада, што паспела», — падкрэсліла Алена.

Жыхарка Брэста Тамара вярнулася дадому за некалькі гадзін да закрыцця мяжы, з унукам гасцявалі ў сваякоў. «Мы планавалі вяртацца менавіта сёння. Крыху было хвалююча з-за навін аб закрыцці граніцы. Але паехалі, білеты бралі загадзя. Усё ў нас добра, дзякуй богу», — расказала брэстаўчанка.

Сярод тых, хто едзе ў Беларусь, не толькі грамадзяне нашай краіны. У чарзе можна сустрэць і прадстаўнікоў Еўрасаюза, якія скарысталіся бязвізам. Закрыццё польскай мяжы іх не пужае. Напрыклад, Ян з Нідэрландаў едзе да сяброў у Мінск. «Па-чалавечы крыўдна, што беларусам візы ў Еўропу патрэбны, а нам у Беларусь — не. Прыязнасць павінна быць з абодвух бакоў. Не баюся ўязджаць у апошні дзень перад закрыццём Польшчай граніцы. Калі яны не адкрыюць, то выеду назад праз Літву», — кажа мужчына.

У Дзяржаўны памежны камітэт Беларусі 11 верасня паступіла афіцыйнае апавяшчэнне Памежнай варты Рэспублікі Польшча аб закрыцці з 1.00 12 верасня па беларускім часе пунктаў пропуску на беларуска-польскай мяжы. Размова ідзе аб аўтадарожных «Брэст» — «Цярэспаль» і «Казловічы» — «Кукурыкі», а таксама чатырох чыгуначных пунктах пропуску: «Гродна» — «Кузніца Беластоцкая», «Бераставіца» — «Зубкі Беластоцкія», «Свіслач» — «Семяноўка». Тэрміны аднаўлення працы пунктаў пропуску польскі бок паабяцаў паведаміць дадаткова.