Месцы для арганізацыі купеляў вызначаюцца адміністрацыяй раёна па ўзгадненні з МНС.

— Абсталяванне месцаў для купання ўскладаецца на ўстановы, якія падалі заяўку аб правядзенні мерапрыемства. І прызначаецца адказная службовая асоба за забеспячэнне бяспекі, — акцэнтаваў Андрэй Войцік.

Пры выбары месца для купання ўлічваецца іх аддаленасць ад пунктаў скіду сцёкавых вод і іншых крыніц забруджвання. Дно акваторыі павінна мець плаўны, паступовы схіл без уступаў да глыбіні 1,8 метра і быць ачышчана ад расліннасці, карчакоў, шкла і іншых старонніх прадметаў. У месцах, адведзеных для купання, не дапускаецца выхад грунтавых вод, наяўнасць віроў, варонак, а таксама цячэнне з хуткасцю больш за 0,5 метра ў секунду. Аптымальная глыбіня палонкі — ад 1,2 да 1,8 метра. Яны павінны злучацца з берагам масткамі ці трапамі.

— Трапы могуць быць металічнымі або драўлянымі. Пры гэтым металічныя трапы павінны мець ахоўныя поручні з грубага ці вяровачнага матэрыялу. Месца для купання абавязкова агароджваецца, — удакладніў Андрэй Войцік.

У начны час купель і падыходы павінны падсвятляцца. Кожная купель павінна мець адзін ці два спускі. Таўшчыня лёду разам са спускам не павінна перавышаць 15 сантыметраў. Калі ўмовы надвор’я не дазваляюць забяспечыць такую таўшчыню, палонку неабходна размяшчаць каля берага.

— Каля выхаду з купелі на беразе павінна знаходзіцца ацепленае памяшканне, вагончык або палатка для абагравання і перапранання людзей, якія выйшлі з вады. Паблізу купелі абавязкова наяўнасць выратавальнага паста, абсталяванага неабходным рыштункам, — пералічыў патрабаванні спікер. — Акрамя таго, для забеспячэння грамадскага парадку ў раёне купанняў павінны несці дзяжурства нарады міліцыі. Каб пазбегнуць правалаў пад лёд, не дапускаецца масавая колькасць людзей на абмежаваным участку лёду.