Як адзначылі арганізатары, конкурс стаў добрай традыцыяй. За апошнія гады ён выклікае вялікую цікавасць і рэзананс у гамяльчан. На гэты раз конкурс прымеркаваны да Года беларускай жанчыны. Яго тэмай стаў вершаваны пасыл: «Я ведаю, што ўсе жанчыны прыгожыя». Удзельнікам прапануецца прачытаць на памяць верш, прысвечаны жанчыне, альбо лагічна завершаны ўрывак з яго. Гэта можа быць твор класіка або сучаснага аўтара.

Да ўдзелу запрашаюцца ўсе ахвотныя ва ўзросце ад 14 гадоў і старэйшыя. Прадугледжаны дзве ўзроставыя катэгорыі: 14-17 гадоў і старэйшыя за 18 гадоў.

Згодна з Палажэннем конкурсу, у троххвілінным выступленні не дапускаецца выкарыстанне дэкарацый, музычнага суправаджэння. Чытальнікі могуць выступаць у адпаведных стылізаваных касцюмах.

«Ацэнка выступлення ўдзельніка ажыццяўляецца па 10-бальнай шкале па некалькіх крытэрыях, уключаючы адпаведнасць твора тэматыцы конкурсу і ўзросту ўдзельніка. Таксама журы ўлічыць выканальніцкае майстэрства, веданне тэксту твора і разуменне яго сэнсавай нагрузкі, артыстызм, здольнасць аказваць эмацыянальнае ўздзеянне на слухачоў. Балы будуць налічвацца і за культуру паводзін на сцэне (знешні выгляд, манеры), пісьменнасць мовы і дыкцыю, правільнасць расстаноўкі лагічных паўз і націскаў. Выніковая адзнака вызначаецца шляхам падсумоўвання балаў, выстаўленых усімі членамі журы», — растлумачылі ў аргкамітэце.

Першы тур праходзіць па 22 лютага. Для ўдзелу ў ім неабходна звярнуцца ў адну з бібліятэк сеткі публічных бібліятэк горада Гомеля. Другі тур адбудзецца напярэдадні Дня жанчын — 5 сакавіка — у цэнтральнай гарадской бібліятэцы імя А.І. Герцэна. 

Пераможцы і прызёры конкурсу будуць узнагароджаны дыпломамі I, II і III ступені і памятнымі падарункамі.

Конкурс чытальнікаў накіраваны на прыцягненне ўвагі да класічнай і сучаснай мастацкай літаратуры розных жанраў, пашырэнне чытацкага кругагляду; стварэнне ўмоў для рэалізацыі творчага патэнцыялу жыхароў горада; развіццё культуры выразнага чытання (дэкламацыі); прыцягненне ўвагі да бібліятэкі як сацыякультурнага цэнтра. Сузаснавальнікамі конкурсу выступаюць Гомельскае абласное аддзяленне Саюза пісьменнікаў Беларусі, Рэдакцыя газеты «Гомельскія ведамасці», Рускі дом у Гомелі, а таксама абласное аддзяленне Рэспубліканскага грамадскага аб’яднання «Беларускі дзіцячы фонд».