Урад Літвы прыняў рашэнне адкрыць два пункты пропуску на граніцы з Беларуссю, якія былі часова закрыты больш за два тыдні, паведамляюць літоўскія СМІ.

Размова ідзе аб пунктах пропуску «Мядзінінкай» (сумежны «Каменны Лог») і «Шальчынінкай» (сумежны «Беняконі»). Яны павінны быць адчыненыя з заўтрашняга дня, 20 лістапада.

«Улічваючы рашэнні Нацыянальнай камісіі бяспекі, прынятыя 18 лістапада гэтага года, што абставіны змяніліся і абмежаванні на перасячэнне дзяржаўнай мяжы, устаноўленыя 29 кастрычніка 2025 года больш не з’яўляюцца неабходнымі для гарантавання ўнутранай бяспекі, мэтазгодна адмяніць абмежаванні, устаноўленыя згаданай пастановай», — заявіў на пасяджэнні кіраўнік МУС Літвы Уладзіслаў Кандратовіч.

Раней прэм’ер-міністр Літвы Інга Ругінене заявіла, што Камісія па нацыянальнай бяспецы рэкамендуе адкрыць гэтыя КПП на літоўска-беларускай граніцы. Паводле яе слоў, падрыхтоўка да адкрыцця граніцы зойме адзін дзень.

Раней літоўскі бок планаваў пакінуць КПП закрытымі да 30 лістапада.