Звяртаючыся да прысутных, пасол Беларусі ў Расіі Аляксандр Рагожнік нагадаў, што ў 2024 годзе інстытуту прэзідэнцтва ў Рэспубліцы Беларусь споўнілася 30 гадоў. «У пачатку 90-х гадоў мінулага стагоддзя вызначальнае значэнне меў выбар эканамічнай мадэлі развіцця дзяржавы. Заходнія дарадцы наперабой прапаноўвалі за бясцэнак распрадаць дзяржаўную ўласнасць, правесці прыватызацыю, стварыць алігархічны клас так званых эфектыўных мэнэджараў, якія павінны былі павесці Беларусь да „светлай рынкавай будучыні“. За прыгожымі заклікамі ўбудавацца ў глабальныя вытворчыя ланцужкі нам адводзілі ролю эканамічнай перыферыі, рынку збыту сваёй прадукцыі і крыніцы таннай працоўнай сілы для заходніх эканомік», — сказаў ён.

«Адказ беларусаў не прымусіў сябе чакаць: на прэзідэнцкіх выбарах 1994 года было сказана рашучае „не“ развалу і заняпаду і голаснае „так“ развіццю і незалежнасці. Гэта стала пачаткам станаўлення прэзідэнцкай рэспублікі», — заявіў пасол.

Паводле яго слоў, час даказаў правільнасць абранага курсу. «Беларусь імкліва развіваецца. За мінулыя 30 гадоў зроблена нямала. Яшчэ больш нам трэба будзе зрабіць. На жаль, свет змяніўся, наперадзе нас чакае доўгі цяжкі шлях», — адзначыў пасол.

Аляксандр Рагожнік звярнуў увагу, што зусім хутка беларускаму народу трэба будзе чарговы лёсавызначальны выбар. «Мы выстаім. Мы зробім свой выбар. Мы пойдзем далей па шляху міру і стварэння. Мы нікому не дазволім перапісаць наша мінулае, навязаць нам сучаснасць і ўпэўнена глядзім у выбраную намі будучыню», — выказаў упэўненасць пасол Беларусі ў РФ.

У канцэрце, які адбыўся ў рамках урачыстага мерапрыемства «За Беларусь!» прынялі ўдзел многія выканаўцы і калектывы беларускай эстрады. У іх ліку — Руслан Аляхно, Вікторыя Алешка, Алёна Ланская, Аляксандра Гайдук, Андрэй Колас, Гюнеш, ансамбль «Верасы», група «Бай-Сіці» і іншыя. Госцем мерапрыемства стаў расійскі спявак, дэпутат Дзярждумы Расіі Дзяніс Майданаў. 

Увазе публікі была прадстаўлена выстава БелТА «Суверэнная Беларусь». Экспазіцыя, якая ўжо пабывала ў многіх беларускіх гарадах, распказвае пра дасягненні Беларусі ў самых розных сферах — прамысловасці і медыцыне, тэхналогіях і навуцы, адукацыі, культуры і сельскай гаспадарцы. Кожная фатаграфія — гэта погляд на развіццё краіны за апошнія 30 гадоў.

Таксама госці мерапрыемства змаглі азнаёміцца з выставай «Маладая Беларусь» Нацыянальнага Цэнтра Сучасных Мастацтваў, якая ўключае ў сябе творы сучаснага беларускага выяўленчага мастацтва.

Фота БелТА