«Оскар» за найлепшы фільм 2026 года забрала карціна «Бітва за бітвай» Пола Томаса Андэрсана. На званне найлепшага фільма года таксама прэтэндавалі «Бугонія», «Гамнет», «Сакрэтны агент», «Сентыментальная каштоўнасць», «Сны цягнікоў», «Марці Цудоўны», «Франкенштэйн», «F1».

Фільм «Бітва за бітвай» атрымаў «Оскара» ў шасці намінацыях. Рэжысёр Пол Томас Андэрсан атрымаў узнагароду за найлепшы адаптаваны сцэнарый і як найлепшы рэжысёр. Касандра Кулукундыс была адзначана ўзнагародай за найлепшы кастынг. Таксама карціна перамагла ў намінацыі «Найлепшы мантаж». Акрамя таго, гэта першы выпадак у гісторыі прэміі, калі ўручаецца ўзнагарода за найлепшы акцёрскі склад. Былі адзначаны і акцёры, якія выканалі ролі другога плана: Шон Пэн, які ўвасобіў на экране палкоўніка Стывена Локджа ў фільме «Бітва за бітвай», і Эмі Мэдыган, якая сыграла Глэдзіс у карціне «Прылады».

На другім месцы па колькасці ўзнагарод апынуўся фільм «Грэшнікі», які атрымаў чатыры статуэткі.

Акцёр Майкл Б. Джордан атрымаў прэмію за найлепшую мужчынскую ролю, за ўзнагароду разам з ім змагаліся Цімаці Шаламэ і Леанарда Ды Капрыа. 

За найлепшую жаночую ролю статуэткай узнагароджана Джэрсі Баклі, якая сыграла ў драме «Гамнет».

Амерыканская акадэмія кінематаграфічных мастацтваў і навук была створана па ініцыятыве заснавальніка кінакампаніі Metro-Goldwyn-Mayer Луіса Маера ў 1927 годзе. Першапачаткова арганізацыя павінна была вырашаць працоўныя спрэчкі, аднак неўзабаве пасля яе заснавання з’явілася ідэя ўручаць ад акадэміі прэстыжныя прэміі ў галіне кіно. Першая цырымонія адбылася 16 мая 1929 года ў Лос-Анджэлесе ў зале гатэля Hollywood Roosevelt.