Японскія навукоўцы з цэнтра RIKEN і Такійскага ўніверсітэта стварылі ўнікальны пластык, які раствараецца ў марской вадзе на працягу некалькіх гадзін, не пакідаючы мікрапластыка, піша Reuters.

У марской вадзе выраб з пластыка памерам з кантэйнер цалкам знік прыкладна за гадзіну пры лёгкім памешванні. На сушы тая ж па памеры пластыкавая нарыхтоўка раскладаецца прыкладна за 200 гадзін.

У той жа час, мяркуецца, што матэрыял можна выкарыстоўваць як звычайны пластык, калі на яго нанесці пакрыццё.

Гэта патэнцыйны прарыў у барацьбе з забруджваннем акіяна — бо паводле прагнозаў Праграмы ААН па навакольным асяроддзі, да 2040 года штогадовы аб’ём пластыкавага смецця ў акіянах можа патроіцца да 23-37 млн ​​тон.