Новы год ва ўсіх нас асацыюецца з рознымі паняццямі. Гэта і ўпрыгожаная ёлка, і духмяныя мандарыны, і яркія феерверкі, і селядзец «пад футрам», а яшчэ — лазня (хто не ведае знакаміты фільм Эльдара Разанава «Іронія лёсу, або З лёгкай парай!»?) Дык ці добрая ідэя хадзіць у лазню пад Новы год?
Наведванне лазні можа быць карысным, калі падыходзіць да яго як да дазаванай цеплавой працэдуры, а не як да выпрабавання на вынослівасць.
Існуюць абсалютныя супрацьпаказанні для лазневых працэдур: ліхаманка, прыкметы ВРВІ, абвастрэнне хранічных захворванняў і нестабільны артэрыяльны ціск.
Катэгарычна нельга наведваць лазню: пры высокай тэмпературы (вышэй 37 °C) або відавочных сімптомах хваробы (кашаль, насмарк) — гэта ўзмоцніць запаленчы працэс. Пры павышаным артэрыяльным ціску — з-за празмернай нагрузкі на сардэчна-сасудзістую сістэму. Пасля нядаўна перанесеных інфаркту ці інсульту таксама забаронена наведваць лазню.
Лазня працуе як прафілактыка толькі на самым пачатковым этапе прастуды, калі чалавек адчувае лёгкае пяршэнне ў горле, дрыжыкі і насмарк, які толькі пачынаецца. У гэтай сітуацыі праграванне можа дапамагчы спыніць развіццё хваробы.
Фізіёлагі рэкамендуюць прытрымлівацца вызначанага рэжыму парання: 2–3 заходы па 5–10 хвілін, пачынаючы з ніжняй паліцы і выбіраючы ўмераную тэмпературу і вільготнасць. Паміж заходамі неабходны адпачынак 10–15 хвілін. Астуджэнне павінна быць паступовым — рэзкія кантрасныя працэдуры накшталт ледзянога душа дапушчальныя толькі для падрыхтаваных людзей і павінны быць выключаны пры схільнасці да павышанага ціску і сардэчна-сасудзістых рэакцый.
Катэгарычна не дапускаецца ўжыванне алкаголю да, падчас і адразу пасля лазні.
Знаходжанне ў парыльні ў стане ап’янення павялічвае верагоднасць сардэчнага прыступу ў пяць разоў. Акрамя таго, больш за 70 % траўмаў у лазні здараюцца менавіта з-за дрэннай каардынацыі рухаў пасля ўжывання спіртнога.
З напояў можна ўзяць з сабой травяную гарбату, ягадны морс, узвар або чыстую ваду — усё, што трэба, каб аднавіць водны баланс.
Таксама нельга парыцца праз сілу, знаходзіцца ў парыльні ў адзіночку і ігнараваць сімптомы недамагання.
Падчас цяжарнасці таксама не рэкамендуецца наведванне лазні. Гэта дапушчальна толькі для тых жанчын, якія рэгулярна хадзілі ў парыльню да цяжарнасці, добра яе пераносяць і не маюць супрацьпаказанняў. І нават у такім выпадку неабходна ўважліва прыслухоўвацца да свайго арганізма і неадкладна выходзіць пры найменшым пагаршэнні самаадчування.
Да сімптомаў, якія патрабуюць неадкладнага спынення працэдуры парання, медыкі адносяць галавакружэнне, млоснасць, пацямненне ў вачах, выяўленую задышку, боль ці сцісканне ў грудзях.
Такім чынам, калі ў вас ёсць такая традыцыя хадзіць перад святам у лазню і вы прытрымліваецеся пералічаных вышэй парад медыкаў, то ў кожны Новы год вы будзеце ўваходзіць бадзёрымі, здаровымі і вясёлымі!
