Бясплатнае харчаванне прадастаўляецца ўсім навучэнцам 1-4 класаў, навучэнцам 5-11 класаў, якія пражываюць і навучаюцца ў сельскіх школах, а таксама дзецям з іншых ільготных катэгорый, напрыклад, са шматдзетных і маламаёмных сем’яў, дзецям-інвалідам, навучэнцам спартыўных класаў. «Сёння больш за 65% школьнікаў атрымліваюць гарачае харчаванне за кошт сродкаў дзяржаўнага бюджэту. Гэта важны элемент сацыяльнай падтрымкі і клопату пра здароўе нашых дзяцей. Навучэнцы, якія наведваюць аб’яднанні па інтарэсах, факультатыўныя і іншыя заняткі, а таксама групу падоўжанага дня на базе школ, могуць загадзя замовіць гарачае харчаванне або скарыстацца школьным буфетам у зручны для іх час», — расказалі ў ведамстве.

Для зручнасці бацькоў і навучэнцаў прадугледжаны гнуткія спосабы аплаты, сярод іх аплата наяўнымі, банкаўскай картай любога беларускага банка, таксама ў Мінску можна выкарыстоўваць лічбавы сэрвіс «разумны буфет» з магчымасцю кантролю выдаткаў у рэальным часе і гарантыяй мэтавага выкарыстання сродкаў выключна на харчаванне.