Традыцыйна, у канцы года яна была накіравана на аналіз вынікаў дзейнасці і фарміраванне планаў на наступны, ужо 2026-ы, год. Былі абмеркаваны таксама вынікі другога пасяджэння VII Усебеларускага народнага сходу.

Савет старэйшын быў заснаваны з мэтай прыцягнення практычнага вопыту і ведаў членаў Савета Рэспублікі папярэдніх скліканняў. Гэты калегіяльны орган сістэмна ўцягнуты ў працэс заканатворчасці і выпрацоўкі дзяржаўнай палітыкі, асабліва ў сферы сацыяльна-эканамічнага развіцця. Члены савета выказваюць свой пункт гледжання па самых вострых пытаннях жыцця краіны, прапаноўваючы ўзважаныя рашэнні, правераныя часам. У далейшым яны разглядаюцца тым жа Саветам Рэспублікі і іншымі дзяржаўнымі органамі.

Наяўнасць такога рэсурсу мудрасці і практычных ведаў дазваляе знаходзіць аптымальны баланс інтарэсаў, пазбягаць магчымых пралікаў і ўпэўнена рухацца наперад. Уклад старэйшын вымяраецца не толькі канкрэтнымі заканадаўчымі ініцыятывамі, але і іх беспярэчным аўтарытэтам, да меркавання старэйшын прыслухоўваюцца як у палітычных колах, так і ў грамадстве. Пераемнасць пакаленняў у дадзеным выпадку — рэальны працоўны інструмент для ўстойлівага і дынамічнага развіцця дзяржавы. 

«Мы шчыра рады бачыць вас сёння тут, у Савеце Рэспублікі, — адзначыла ў сваім прывітальным слове Старшыня Савета Рэспублікі Нацыянальнага сходу Рэспублікі Беларусь Наталля КАЧАНАВА. — Віншуем з надыходзячым Новым годам і Калядамі і дзякуем за ўсё, што вы рабілі і робіце для нашай краіны і нашага народа, за неацэнны досвед, які вы перадаяце тым, хто працягвае працаваць у Савеце Рэспублікі». 

Безумоўна, кожны член савета старэйшын валодае ўласным бачаннем, у тым ліку і на пытанні, што датычацца супрацоўніцтва з замежнымі краінамі і арганізацыямі. Гэтыя і іншыя тэмы шырока абмяркоўваліся на другім пасяджэнні VII УНС, у Пасланні Прэзідэнта да беларускага народа і парламента. Намеснік Старшыні Савета Рэспублікі шостага склікання Мар’яна ШЧОТКІНА адзначыла яго маштабнасць, дакладнасць і практычную накіраванасць, падкрэсліўшы, што ў Пасланні былі дадзены адказы на пытанні, якія хвалююць народ, закрануты тэмы глабальнай і знешняй палітыкі. І менавіта ад кіраўніка дзяржавы грамадзяне атрымліваюць доступ да найбольш праўдзівай інфармацыі. 

Асаблівую ўвагу Мар’яна Шчоткіна ўдзяліла таксама прынятай Праграме сацыяльна-эканамічнага развіцця на наступныя пяць гадоў, адзначыўшы яе ключавую асаблівасць — чалавекацэнтрычнасць. Бо праграма на першае месца ставіць менавіта дабрабыт чалавека, стварэнне камфортных умоў для жыцця, адукацыі, аховы здароўя і развіцця інфраструктуры. Дарэчы, усе гэтыя мэты падмацаваныя пэўнымі лічбамі фінансавання і паказчыкамі выканання, якія абавязкова трэба будзе дасягнуць. «Калі кожны з нас будзе працаваць сумленна на сваім рабочым месцы, на што неаднаразова звяртаў увагу наш Прэзідэнт, калі мы будзем пастаянна аналізаваць, што робім мы асабіста і ў складзе працоўнага калектыву, — усе пастаўленыя ў праграме задачы дакладна будуць выкананы».

На Усебеларускім народным сходзе былі вызначаны асноўныя паказчыкі і стратэгія іх дасягнення, але тактыка, па словах Старшыні Савета Рэспублікі чацвёртага склікання Барыса БАТУРЫ, яшчэ будзе выпрацоўвацца ў кожным галіновым міністэрстве і дзяржаўным органе. «Таму такія мерапрыемствы ў Савеце Рэспублікі, у ходзе якіх савет старэйшын таксама прымае ўдзел у выпрацоўцы тактычных рашэнняў, бясспрэчна, вельмі важныя», — адзначыў Барыс Батура.

Старшыня Савета Рэспублікі Нацыянальнага сходу Наталля Качанава расказала таксама аб першым — і паспяховым — вопыце правядзення ў снежні гэтага года ваенна-патрыятычнага форуму сумесна з Міністэрствам унутраных спраў, які сабраў кадэтаў і ўдзельнікаў патрыятычных клубаў краіны. Атрымалася, па словах Наталлі Качанавай, не толькі цікавая, але і важная, неабходная зараз размова з моладдзю. А вось на штогадовай аснове ў краіне праводзіцца беларуска-ўзбекскі форум. У гэтым годзе мерапрыемства пашырыла напрамкі дзейнасці — дадалася секцыя, прысвечаная мясцоваму самакіраванню.

Аміна НАЗАРАВА

Чытайце таксама: У Савеце Рэспублікі адобрылі шэраг важных законапраектаў