Старшыня Савета Рэспублікі Наталля КАЧАНАВА адзначыла, што геаграфія Форуму рэгіёнаў з кожным годам пашыраецца, і падкрэсліла значнасць рэгіянальнага ўзаемадзеяння. Яна назвала эфектыўным супрацоўніцтва бакоў па «гарызанталі»: «Калі губернатар працуе з губернатарам, кіраўнік заканадаўчага сходу з нашым старшынёй абласнога Савета дэпутатаў, прадпрыемства з прадпрыемствам. Але ўсяму гэтаму, вядома, спрыяе і тая шырокая дагаворна-прававая база, якая дзейнічае паміж нашымі краінамі». 

Ініцыятывы і праекты, якія вылучаюць губернатары, па словах Наталлі Качанавай, арыентаваны на паляпшэнне якасці жыцця нашых грамадзян: «У гэтым ёсць важкі вынік. Станоўчая дынаміка гандлю. За апошнія пяць гадоў тавараабарот паміж нашымі краінамі вырас амаль у два разы. Больш чым удвая павялічыўся абарот у сферы паслуг. Высокая дынаміка сустрэч назіраецца і на ўзроўні бізнесу дзвюх краін. У 2025 годзе адбылося 56 візітаў дзелавых колаў расійскіх рэгіёнаў у нашу краіну ў складзе афіцыйных дэлегацый. Дзелавыя колы Беларусі ажыццявілі 109 візітаў у расійскія рэгіёны».

Старшыня Савета Рэспублікі падкрэсліла, што беларуска-расійскія адносіны не абмяжоўваюцца толькі ўзаемным гандлем: «Я хацела б прывесці шэраг канкрэтных прыкладаў інвестыцыйнага супрацоўніцтва. Сумесна з расійскімі калегамі ў Гродзенскай вобласці мы пабудавалі магутны завод па перапрацоўцы насення рапсу. У гэтым жа рэгіёне заканчваецца стварэнне вытворчасці па перапрацоўцы насення сланечніку для выпуску прадукцыі з высокай дабаўленай вартасцю. У вытворчасці электробусаў у Ніжагародскай вобласці задзейнічаны беларускія і расійскія прадпрыемствы. А мінскае метро перавозіць сёння нашых грамадзян у камфортных і сучасных вагонах, вытворчасць якіх ажыццяўляецца з выкарыстаннем беларускіх станкоў у горадзе Мыцішчы Маскоўскай вобласці на заводзе з больш чым векавой гісторыяй. У мінулым годзе ў расійскім Васкрасенску пачаў дзейнічаць завод кабельнай прадукцыі з поўным цыклам вытворчасці. Сёння разглядаецца пытанне аб пашырэнні яго магутнасцяў. Такіх прыкладаў можна прыводзіць досыць шмат. І мы рады таму, што яны з’яўляюцца, ствараюцца новыя прадпрыемствы, вытворчасці. Гэта ўсё — несумненна на карысць нашых народаў і нашых краін». 

Старшыня Савета Федэрацыі Валянціна МАТВІЕНКА адзначыла запатрабаванасць беларуска-расійскага дыялогу на палях Форуму рэгіёнаў. 

«З расійскага боку прыехала вельмі прадстаўнічая дэлегацыя — больш за 700 чалавек, звыш 70 суб’ектаў Расійскай Федэрацыі, — падкрэсліла Валянціна Матвіенка. — Мы папрацавалі з нашымі беларускімі калегамі вельмі эфектыўна. І, як заўсёды, форум наш накіраваны на вынік».

Перад пачаткам сустрэчы спікеры верхніх палат парламентаў дзвюх краін агледзелі выстаўку-кірмаш рэгіёнаў Беларусі і Расіі.

Завяршэннем сустрэчы стала падпісанне шэрагу міжрэгіянальных пагадненняў і мемарандумаў аб супрацоўніцтве.

Яна ВАЛАСАЧ

Фота БелТА