Ён аб’яднае ў сабе не толькі гістарычную памяць шматлікіх пакаленняў тарфянікаў у выглядзе музейнай экспазіцыі, але і стане пляцоўкай для правядзення тэматычных экскурсій, арганізацыі ва ўзаемадзеянні з установамі адукацыі падрыхтоўкі спецыялістаў патрэбных спецыяльнасцяў. 

Вітаючы ўдзельнікаў мерапрыемства, старшыня Мінскага аблвыканкама Аляксей Кушнарэнка падкрэсліў, што тарфянікі заслужылі гэты аб’ект сваёй працай на карысць Радзімы, якая працягваецца ўжо больш за стагоддзе.

«Я ўпэўнены, што цэнтр стане месцам прыцягнення, паколькі тут плануецца развіваць унікальны прамысловы турызм. І гэта, безумоўна, будзе апорай тарфяной прамысловасці», — сказаў кіраўнік цэнтральнага рэгіёна.

У размове з журналістамі Аляксей Кушнарэнка таксама адзначыў, што торф — наш нацыянальны здабытак. 

«Рэспубліка Беларусь валодае яго значнымі запасамі, з’яўляючыся адным з сусветных лідараў яго здабычы і вытворчасці, — дадаў губернатар. — Пэўны час таму практычна ўся энергетыка працавала на торфе. Не ўсе ведаюць, але і прамысловы гігант БЕЛАЗ будаваўся менавіта як завод тарфянога машынабудавання. Зразумела, што за гэты час галіна трансфармавалася, тым не менш, на сённяшні дзень большасць горназдабыўных, перапрацоўчых прадпрыемстваў якраз сканцэнтраваны ў Мінскай вобласці. І для нас сёння вялікі гонар быў адкрыць гісторыка-адукацыйны цэнтр». 

Міністр энергетыкі Дзяніс Мароз анансаваў, што ў 2028-м тарфяная прамысловасць адзначыць сваё 110-годдзе, і ўвесь гэты час галіна бесперапынна адыгрывае важную ролю ў развіцці краіны. 

«У першую чаргу гэта была энергетычная бяспека. Усе ведаюць, што энергетыка нашай краіны ў пачатку папярэдняга стагоддзя будавалася менавіта на торфе. Далей да нас прыйшоў прыродны газ, роля торфу некалькі зніжалася, але заўсёды аказвала значны ўплыў на тое, што адбываецца ў нас. На цяперашні момант адбываецца трансфармацыя, але торф па-ранейшаму адыгрывае найважнейшую ролю. Мы здабываем больш за 2 мільёны тон торфу ў год. Ільвіная доля прыпадае, вядома, на энергетычны сектар, але самае галоўнае, што мы сёння пастаянна развіваем неэнергетычны кірунак. Вельмі вялікую цікавасць выклікаюць і ўнутры краіны, і за мяжой менавіта грунтавыя кірункі, глыбокая перапрацоўка торфу. Асаблівую ўвагу гэтаму кірунку ў тым ліку надае і кіраўнік дзяржавы. Па яго даручэнні мы сёння на агракамбінаце „Дзяржынскі“ праводзім асобны эксперымент па выкарыстанні торфу для ўзбагачэння зямель. Усё гэта сведчыць, што торф быў, ёсць і будзе», — сказаў Дзяніс Мароз.

Чакаецца, што агульная загружанасць цэнтра складзе каля 1624 гадзіны (203 дні) у год. Варта адзначыць, што акрамя арганізацыі адукацыйнага працэсу ён дазволіць вырашыць шэраг важнейшых задач. А менавіта: паспрыяе захаванню гісторыі і папулярызацыі тарфяной галіны, будзе карысны для абмену перадавым вопытам, дапаможа ў развіцці прамысловага турызму.

Яна ВАЛАСАЧ 

Фота аўтара