Прадстаўнік Мінадукацыі адзначыла, што ў мінулым навучальным годзе ведамствам узаконены падыходы да знешняга выгляду школьнікаў — на ўроках яны павінны знаходзіцца ў адзенні дзелавога стылю. Усе ўстановы адукацыі вызначыліся з уласнай каляровай гамай і адзінымі элементамі адзення вучняў.

«У новым навучальным годзе ніякіх змяненняў, што датычацца адзення дзелавога стылю, не адбылося. Міністэрствам адукацыі сумесна з Міністэрствам антыманапольнага рэгулявання і гандлю праводзіцца работа, накіраваная на тое, каб падрыхтоўка дзяцей да школы была для бацькоў максімальна камфортнай, прайшла без мітусні, каб бацькі разумелі, дзе купіць і што купіць», — расказала Ірына Каржова.

На сайце Міністэрства адукацыі размешчаны каталог адзення для школьнікаў 2026/2027 навучальнага года, таксама там можна знайсці мінімальны базавы пералік канцылярскіх прылад, якія неабходна набыць да пачатку заняткаў.

«Гэты каталог з’яўляецца прыкладным і створаны ў дапамогу бацькам пры падрыхтоўцы дзяцей да школы. Аднак бацькі павінны разумець, што асноўнае патрабаванне да адзення — гэта каляровая гама і адзіны элемент, якія вызначаны для гэтай установы адукацыі. А ўжо купляць адзенне з гэтага каталога ці не, а можа нават самастойна пашыць — гэта права бацькоў», — падкрэсліла начальнік упраўлення.

У гандлёвых аб’ектах з другой палавіны ліпеня пачалі працаваць школьныя базары (іх больш за 250), дзе можна знайсці ўвесь неабходны асартымент: адзенне, абутак, спартыўную форму, канцылярскія прылады. «Арганізаваны асобныя памяшканні з адзеннем для хлопчыкаў, асобныя памяшканні з адзеннем для дзяўчынак. Для зручнасці ёсць вялікія камфортныя прымерачныя, каб бацькі разам з дзецьмі маглі падабраць адзенне і прыгожа выглядаць на навучальных занятках. Акрамя таго, гандлёвымі аб’ектамі прадугледжаны дні школьніка, у якія пакупнікам прадастаўляюцца скідкі на асартымент школьнага адзення і канцылярскія прылады. Так, скідкі на адзенне дасягаюць 30%, на канцылярскія прылады — 15%. Прадугледжаны і сацыяльныя акцыі, калі ёсць пэўныя скідкі для дзяцей са шматдзетных сем’яў, для сем’яў, якія выхоўваюць дзяцей-інвалідаў, для дзяцей з дамоў сямейнага тыпу», — дадала Ірына Каржова.

Міністэрства адукацыі сумесна з рэгіянальнымі ўпраўленнямі адукацыі з 20 ліпеня праводзіць маніторынг гандлёвых аб’ектаў, дзе арганізаваны школьныя кірмашы. Асноўная ўвага ўдзяляецца наяўнасці дастатковага асартыменту, размернага рада і каляровай гамы, неабходнай для адукацыйных устаноў.

«Хачу запэўніць усіх бацькоў, што аб’екты працуюць у планавым парадку, асартымент шырокі, мадэлі разнастайныя, і хлопчыкі і дзяўчынкі на навучальных занятках будуць выглядаць прыгожа, па-дзелавому — для атрымання ведаў», — рэзюмавала Ірына Каржова.

Што датычыцца дзённікаў навучэнцаў, то іх форма да новага навучальнага года таксама не змянялася. Узоры дзённікаў размешчаны на сайце Міністэрства адукацыі.