Традыцыйна ўрачыстая цырымонія прынясення прысягі адбылася напярэдадні Дня выратавальніка, які штогод святкуецца 19 студзеня. На вернасць Радзіме і народу прысягнулі 78 навабранцаў са сталічнага гарнізона, Універсітэта грамадзянскай абароны МНС, а таксама авіяцыі выратавальнага ведамства. Сёння яны прынялі на сябе абавязацельствы сумленна выконваць службовы абавязак, быць адказнымі, прафесійнымі і мужнымі, служыць на карысць Рэспублікі Беларусь, абараняючы жыццё і бяспеку грамадзян.

«Сёння для мяне вельмі важны дзень. Я прысягаю на вернасць свайму народу, краіне. Прафесія выратавальніка патрабуе мужнасці і адвагі. Такая работа мне па душы. З кожным днём я ўсё мацней у гэтым пераконваюся», — падзяліўся сваімі эмоцыямі малады выратавальнік Віктар Уладыка. 

З урачыстым і значным момантам навабранцаў павіншаваў начальнік Мінскага гарадскога ўпраўлення МНС Віталь Суша. «Сённяшні дзень асаблівы для вас. Бо вы далі клятву на адданае служэнне краіне. Вы павінны быць да канца вернымі абавязку, прынесенай прысязе і беларускаму народу. Перад Міністэрствам па надзвычайных сітуацыях стаіць шэраг сур’ёзных патрабаванняў. Я ўпэўнены, што дзякуючы зладжанай рабоце мы з вамі зможам выканаць любыя пастаўленыя задачы. Служыце верна, дапамагайце людзям, працуйце над павышэннем свайго прафесійнага ўзроўню», — даў наказ Віталь Суша.

Шчырыя віншаванні ў адрас навабранцаў прагучалі і ад ветэранаў службы, прадстаўнікоў духавенства і родных.

Пасля цырымоніі прынясення прысягі ўдзельнікі мерапрыемства ўсклалі кветкі да стэлы «Мінск — горад-герой». Завяршылася мерапрыемства экскурсіяй па Беларускім дзяржаўным музеі гісторыі Вялікай Айчыннай вайны.