Па падазрэнні ў махлярстве была затрымана 33-гадовая жыхарка Мазыра.

Высветлілася, што фігурантка размясціла ў інтэрнэце аб’яву аб здачы кватэры. Для гэтага яна выкарыстоўвала чужыя фатаграфіі, узятыя ў адкрытым доступе. Жанчына актыўна перапісвалася з будучымі арандатарамі, аднак пад рознымі падставамі адкладала агляд жылля ці прыводзіла ў тую кватэру, дзе жыве сама і якую не збіралася здаваць.

Калі людзі згаджаліся на прапанову, зламысніца прасіла адразу ж пералічыць або перадаць ёй асабіста перадаплату яшчэ да заключэння дагавора і перадачы ключоў ад жылля. Пасля атрымання грошай жанчына пераставала выходзіць на сувязь.

Акрамя грамадзян, якія сталі ахвярамі падману, яшчэ двое патэнцыйных арандатараў своечасова западозрылі нядобрае, не сталі пераводзіць грошы і звярнуліся ў міліцыю.

Супраць фігуранткі заведзены крымінальныя справы. Агульная сума шкоды склала больш за дзве тысячы BYN. Праверка працягваецца.

У міліцыі нагадваюць, што не варта пералічваць грошы за арэнду кватэры да яе агляду і заключэння афіцыйнага дагавора.