Рэвалюцыйны метад лячэння пацыентаў анкагематалагічнага профілю — таматэрапію — укаранілі спецыялісты Мінскага навукова-практычнага цэнтра хірургіі, транспланталогіі і гематалогіі. Пра гэта расказаў намеснік дырэктара па гематалогіі гэтай медустановы, кіраўнік Рэспубліканскага цэнтра гематалогіі і перасадкі касцявога мозгу, доктар медыцынскіх навук, прафесар Анатоль Ус.
Па словах спецыяліста, пры падтрымцы Міністэрства аховы здароўя і Камітэта па ахове здароўя Мінгарвыканкама праведзена рэканструкцыя аднаго з блокаў цэнтра. Там устанавілі сучасны лінейны паскаральнік — апарат таматэрапіі.
— Сёння гэта высокатэхналагічнае абсталяванне — адзінае на прасторах СНД, — звярнуў увагу Анатоль Ус. — Апарат новага пакалення з элементамі штучнага інтэлекту. Гэта дазваляе істотна павысіць эфектыўнасць лячэння пацыентаў, уключаючы іх падрыхтоўку да трансплантацыі касцявога мозгу.
Прафесар адзначыў, што таматэрапія — гэта вельмі сучасны метад лячэння, сутнасць якога заключаецца ў прыцэльным апрамяненні ракавых клетак.
— Ёсць таргетныя лекавыя прэпараты, якія вельмі эфектыўныя ў анкалогіі, гематалогіі, — растлумачыў Анатоль Ус. — У радыялогіі, дзе выкарыстоўваюцца прамянёвыя метады, аналагічна працуе машына таматэрапіі: «страляе», як з гарматы, выключна ў цэль — па пухлінных тканках, не закранаючы пры гэтым здаровыя. І гэта новая вяха ў тэрапіі злаякасных утварэнняў! Таксама на апараце праводзіцца прамянёвая тэрапія пацыентам з пухлінамі печані, якія чакаюць трансплантацыю гэтага органа.
Урач расказаў, што інавацыйнае лячэнне даступна для дарослых і дзяцей са сталіцы і рэгіёнаў Беларусь, а таксама для замежных пацыентаў. Пры гэтым для грамадзян Беларусі таматэрапія праводзіцца бясплатна, як і перасадка касцявога мозгу, печані, іншых органаў.
Анатоль Ус падкрэсліў, што ў МНПЦ хірургіі, транспланталогіі і гематалогіі дапамогу гематалагічным пацыентам аказваюць спецыялісты высокага ўзроўню. Акрамя таго, нядаўна ў цэнтры ўвялі ў эксплуатацыю сучасны корпус гематалогіі і трансплантацыі ствалавых клетак, дзе, у тым ліку, размясціліся новыя аддзяленні трансплантацыі, рэанімацыі.
Фота Лізаветы Давідоўскай
