Юрый Супрановіч адзначыў, што штодня на вуліцы горада выязджае каля паўтары тысячы аўтобусаў, тралейбусаў, электробусаў, трамваяў. Таксама курсіруюць маршруткі. Маршрутная сетка пастаянна ўдасканальваецца. За апошнія пяць гадоў адкрыты 41 маршрут, закрыты — 21. Усяго ж налічваецца 322 маршруты грамадскага транспарту, 30 — экспрэсных. Акцэнт — на развіцці сістэмы транспартна-перасадачных вузлоў, каб пасажырам было зручна перасаджвацца з аднаго віду транспарту на іншы. 

У работу ўкараняюцца і новыя тэхналогіі. У прыватнасці, дзейнічае бясплатная галасавая паслуга аб прыбыцці транспарту. Каб ёй скарыстацца, трэба патэлефанаваць па кароткім нумары 488 і паведаміць аўтаадказчыку код прыпынку. Яго можна знайсці на таблічцы з раскладам каля QR-кода. Галасавы памочнік паведаміць час прыбыцця бліжэйшых аўтобусаў, тралейбусаў і трамваяў. Паслуга бясплатная. 

«Вялікая ўвага ўдзяляецца пашырэнню спосабаў і формаў аплаты праезду. У прыватнасці, у першым паўгоддзі ў метрапалітэне ўкаранёна сістэма „Аплаці“ з магчымасцю рэалізацыі праязных дакументаў. На першым тралейбусным маршруце тэстуем сістэму аплаты праезду банкаўскай картай, а ў наступным месяцы пастараемся максімальна паскорыць працэс, запусціць яе на першым аўтобусным маршруце. Дапрацоўваем чат-бот для зваротнай сувязі з пасажырамі, атрымання ацэнкі, прапаноў, адпрацоўкі недахопаў», — расказаў Юрый Супрановіч. Пілотны праект будзе маштабаваны. У 2026 годзе значна павялічыцца колькасць рухомага саставу, дзе можна будзе расплаціцца такім спосабам.

Яшчэ адзін кірунак развіцця — электрыфікацыя рухомага саставу. Прадугледжана абнаўленне аўтапарка.

Юрый Супрановіч адзначыў, што штодня ў будні паслугамі грамадскага транспарту карыстаюцца каля 1,8 млн чалавек, з іх 1,1 млн — наземным транспартам. За дзевяць месяцаў бягучага года ўжо перавезена звыш 540 млн пасажыраў, у той час як за аналагічны перыяд мінулага года — 324 млн, а за студзень — верасень 2023-га — 285 млн.