Супрацоўнікі ГУУС Мінска і наркакантролю затрымалі двух жыхароў Віцебскай вобласці — 46-гадовага ўладальніка лазневага комплексу і яго дапаможнага рабочага. Па дадзеных следства, яны арганізавалі ў даркнеце інтэрнэт-краму па продажы забароненых рэчываў, распавялі ў МУС.

Схема працавала так: адзін з фігурантаў на аўтамабілі жонкі прывозіў буйныя партыі наркотыкаў з-за мяжы. Саўдзельнікі фасавалі «тавар» і размяркоўвалі яго па схованках-закладках па ўсёй Беларусі. Падчас вобыскаў канфіскавана больш за 8 кг забароненых рэчываў у кватэры і закладках. 

У выніку аператыўнай распрацоўкі арыштаваны яшчэ 16 чалавек, якія маюць дачыненне да збыту наркотыкаў. Распачаты крымінальныя справы, следчыя ўстанаўліваюць усе эпізоды злачыннай дзейнасці групы.