На сённяшні дзень у Мінскай вобласці функцыянуюць 7 выратавальных станцый і 59 выратавальных пастоў, з якіх 17 з’яўляюцца пастаяннымі, а 42 — сезоннымі.

«У гэтым годзе да пачатку пляжнага сезона 1 мая ў Мінскай вобласці абсталявана 108 месцаў для купання (у 2025-м іх было 106). Супрацоўнікамі Мінскай абласной арганізацыі АСВОД сумесна з МНС праведзена работа па ачыстцы акваторый вадаёмаў. Таксама была абноўлена матэрыяльна-тэхнічная база станцый і пастоў — у парк арганізацыі паступілі дзве новыя лодкі, абсталяваныя святлосігнальнымі гучнагаварыцельнымі ўстаноўкамі. Адна з іх накіравана на выратавальную станцыю „Нарач“, другая — на Барысаўскую выратавальную станцыю. Акрамя таго, ажыццяўляецца закупка абсталявання для двух новых выратавальных пастоў — у Лагойску і Заслаўі», — расказалі ў АСВОДзе.

У цяперашні час усе выратавальныя пасты і месцы для купання абсталёўваюцца інфармацыйнымі шчытамі з прафілактычнымі плакатамі, якія нагадваюць аб асноўных правілах бяспекі на вадзе.