Суботнік па добраўпарадкаванні гарадскіх пасёлкаў пад дэвізам «Зробім пасёлак чыстым самі!» пройдзе па ініцыятыве дэпутацкага корпуса Мінскай вобласці, пры ўдзеле членаў Савета Рэспублікі, дэпутатаў Палаты прадстаўнікоў, а таксама Маладзёжнага парламента Мінскай вобласці. Далучыцца да акцыі дэпутаты прапануюць і мясцовым жыхарам, якія могуць таксама ўнесці свой уклад у навядзенне парадку і ўтульнасці на прыдамавых тэрыторыях прыватных домаўладанняў, дварах шматкватэрных жылых дамоў і вуліцах сваіх населеных пунктаў.

«Населеныя пункты, у якіх пройдзе суботнік, вызначаны ў кожным раёне Мінскай вобласці. Так, у Валожынскім раёне яго ўдзельнікі папрацуюць у гарадскім пасёлку Івянец, у Клецкім — у аграгарадку Морач, у Мінскім — у гарадскім пасёлку Мачулішчы, у Смалявіцкім — у гарадскім пасёлку Зялёны Бор. У суботніку прымуць удзел дэпутаты ўсіх узроўняў. Разам з работнікамі жыллёва-камунальных і дарожных службаў, лясгасаў, устаноў сацыяльнай сферы і прамысловых прадпрыемстваў, прадстаўнікамі мясцовых выканаўчых органаў улады будзем працаваць на агульны вынік», — расказала старшыня Мінскага абласнога Cавета дэпутатаў Наталля Якубіцкая.

Яна таксама падкрэсліла, што суботнік не стане разавай акцыяй і ў Год добраўпарадкавання дэпутаты прадоўжаць прымаць удзел у навядзенні парадку ў населеных пунктах.