На Маскоўскім міжнародным кніжным кірмашы шырокая ўвага наведвальнікаў скіравана да стэнда «Кнігі Беларусі», арганізаванага Міністэрствам інфармацыі Рэспублікі Беларусь. Жыхары Масквы, госці сталіцы Расіі знаёмяцца з кніжнымі навінкамі Выдавецкага дома «Звязда», выдавецтваў «Беларуская навука», «Мастацкая літаратура», «Адукацыя і выхаванне», «Беларусь».
Работнікі ААТ «Белкніга», мінскай «Цэнтральнай кнігарні», якія працуюць у гэтыя дні на стэндзе «Кнігі Беларусі», пазнаёмілі наведвальнікаў з кнігамі Вячаслава Бандарэнкі, Алены Харашэвіч, Андрэя Мукавозчыка, Мікалая Чырскага.
Асобная ўвага да кніг серыі «Бібліятэка паэзіі», на старонках якіх — вершы Кандрата Крапівы, Уладзіміра Дубоўкі, Віктара Шніпа.
Часцей за іншыя выданні масквічы набываюць кнігу Аляксандра Вашчанкі «Беларуская кухня», а таксама турыстычныя, краіназнаўчыя выданні розных беларускіх выдавецтваў.
Гасцямі стэнда ў першыя дні працы кніжнага кірмашу пабывалі адказны сакратар праўлення Саюза пісьменнікаў Расіі Мікалай Іваноў, галоўны рэдактар «Роман-газеты» Юрый Казлоў, вядомы крытык і літаратуразнаўца Вячаслаў Агрызка і іншыя пісьменнікі, кнігавыдаўцы.
Мікола БЕРЛЕЖ,
г. Москва
