У пячоры Лянг-Метандуна на інданезійскім востраве Муна знойдзены ледзь адрозны контур чалавечай рукі, ён можа быць найстаражытнейшым з вядомых у свеце наскальных малюнкаў. Пра гэта паведамляе газета The Guardian са спасылкай на даследаванне, апублікаванае ў навуковым часопісе Nature. Перадае БелТА.
Паводле ацэнак археолагаў, трафарэтны адбітак быў створаны не менш за 67,8 тыс. гадоў таму. Малюнак з часам пацямнеў і цяпер ледзь адрозніваецца на сцяне пячоры. Па словах навукоўцаў, ён, як і іншыя падобныя малюнкі, быў створаны шляхам распылення пігмента па-над рукой, прыціснутай да скальнай сцяны. Адбітак мае вузкія, завостраныя пальцы, што, на думку даследчыкаў, з'яўляецца наўмыснай мадыфікацыяй.
Узрост малюнка ўдалося ўстанавіць дзякуючы аналізу мікраскапічных адкладанняў кальцыту, якія сфарміраваліся па-над малюнкам. Па словах даследчыкаў, людзі вярталіся ў гэту пячору на працягу тысячагоддзяў, пакідаючы новыя малюнкі, самыя "маладыя" з якіх налічваюць каля 35 тыс. гадоў.
Знаходка не толькі пашырае ўяўленні аб зараджэнні мастацтва, але і можа праліць святло на старажытныя міграцыі чалавека. Археолагі мяркуюць, што такія трафарэтныя малюнкі маглі быць створаны продкамі карэнных аўстралійцаў і пацвярджаюць гіпотэзу аб засяленні паўночнай Аўстраліі больш за 65 тыс. гадоў таму.
Навукоўцы падкрэсліваюць, што аўтарства выявы застаецца прадметам дыскусій. Разам з Homo sapiens яго маглі стварыць і іншыя старажытныя віды, уключаючы неандэртальцаў, чыя прысутнасць у рэгіёне таксама не выключаецца.
