За актыўную грамадзянскую пазіцыю і садзейнічанне органам унутраных спраў заахвочана супрацоўніца ААТ «Беларусбанк» Святлана Байкова, якая парушыла планы зламыснікаў, што імкнуліся завалодаць чужымі зберажэннямі. У прысутнасці калектыву падраздзялення падзяку, кветкі і грашовую прэмію ёй уручыў першы намеснік начальніка Ленінскага РАУС Гродна Дзмітрый Шкадаў.

Ён адзначыў, што дзякуючы пільнасці, уважлівасці і прафесіяналізму спецыяліст банка прадухіліла крадзеж каля 28 тыс. беларускіх рублёў, якія належаць аднаму з жыхароў абласнога цэнтра.

Трапіўшы пад уплыў махляроў, жыхар Гродна папоўніў рахунак, пасля чаго звярнуўся да Святланы Байковай, каб зняць усе грошы. Аднак, удакладніўшы рэшту, спецыяліст паведаміла, што з рахунку нядаўна спісаны грашовыя сродкі ў памеры 3 тыс. беларускіх рублёў. Рахунак пасля гэтага быў заблакаваны ў сувязі з вычарпаннем сутачнага ліміту пераводаў з карты на карту. Мужчына настойліва патрабаваў, каб яму выдалі грошы.

«Я звярнула ўвагу на дзіўныя паводзіны кліента. Ён увесь час глядзеў на экран мабільнага тэлефона, і, нібы знаходзячыся пад гіпнозам, патрабаваў выдаць яму ўсе грошы з рахунку. Але мая інтуіцыя падказвала не спяшацца», — расказала Святлана Байкова. Яна працягвала гутарыць з грамадзянінам, папярэджваючы аб магчымым уплыве ашуканцаў. І той, нарэшце, прыняў рашэнне пайсці дадому. Супрацоўнік банка паведаміла пра здарэнне ў міліцыю, а праз некаторы час ужо і сам мужчына звярнуўся ў раённы аддзел унутраных спраў з заявай.

Як сцвярджае начальнік аддзялення па супрацьдзеянні кіберзлачыннасці Ленінскага РАУС Антон Стральчонак, махляры працягваюць выкарыстоўваць розныя схемы падману. Каб супрацьстаяць гэтым злачынствам, праваахоўнікі робяць упор на прафілактыку. У тым ліку наладжана цеснае ўзаемадзеянне з банкаўскімі ўстановамі, размешчанымі на тэрыторыі раёна.

«Калі вам тэлефануюць невядомыя і патрабуюць здзейсніць фінансавыя маніпуляцыі, імкнуцца атрымаць персанальныя даныя, не даюць падумаць, прыспешваюць, пагражаюць і іншымі спосабамі аказваюць псіхалагічны ціск, варта неадкладна спыніць размову і паведаміць аб тым, што здарылася, у міліцыю», — папярэджваюць праваахоўнікі.