З 20 верасня ў сталіцы і Мінскай вобласці сёлета распачнуцца сезонныя сельскагаспадарчыя кірмашы, якія будуць праходзіць пераважна ў выхадныя. Традыцыйна тут можна будзе набыць для зімовых запасаў бульбу, садавіну і агародніну, ягады і мёд, а таксама мясныя далікатэсы і рыбу, малочную, кандытарскую і прадукцыю кулінарыі, прамысловыя тавары і вырабы рамеснікаў.
Будзе арганізавана дапамога па дастаўцы набытай на кірмашах прадукцыі сацыяльна неабароненым катэгорыям грамадзян — ветэранам, адзінокім пажылым людзям, інвалідам, а таксама дастаўка да асабістага транспарту.
У сталіцы сезон сельскагаспадарчых кірмашоў мяркуецца скончыць 7 снежня, калі надвор’е будзе гэтаму спрыяць. Сёлета асноўнай лакацыяй у Мінску застаецца «Чыжоўка-арэна». Побач з Палацам спорту плануецца правядзенне кірмашоў на працягу ўсяго некалькіх выхадных — 20 і 21 верасня, а таксама аднойчы ў кастрычніку і лістападзе. Арганізавана гэта лакацыя для жыхароў Цэнтральнага раёна сталіцы, якім далёка ехаць да асноўнай раённай пляцоўкі.
Зрэшты, па некалькі пляцовак для кірмашоў прадугледжаны ў кожным раёне Мінска. Іх адрасы і графікі работы размешчаны на сайтах раённых адміністрацый і Мінгарвыканкама. Кірмаш на «Чыжоўцы-арэне» будзе працаваць кожныя выхадныя з 8 да 16-17 гадзін, у астатніх раёнах —пераважна з 10 да 16-17 гадзін.
Асноўны акцэнт будзе зроблены на свежую айчынную плодаагароднінную прадукцыю. Шырокі асартымент прадставяць прадпрыемствы «Белкаапсаюза», рыбныя гаспадаркі, вытворцы мясной і малочнай прадукцыі.
— Пачынаючы з вясны, пытанне з бульбай было на асаблівым кантролі. Улічваючы, што фермеры і іншыя вытворцы значна павялічылі пасяўныя плошчы пад гэту культуру і той факт, што сёлета ўраджайнасць дастаткова добрая, вялікі выбар розных сартоў бульбы будзе прадстаўлены на сельскагаспадарчых кірмашах, — падкрэсліла начальнік галоўнага ўпраўлення гандлю і паслуг Мінгарвыканкама Алена НАГОРНАЯ.
У Мінскай вобласці з 20 верасня таксама пачнуць сваю работу сезонныя кірмашы, праходзіць яны будуць да 1 лістапада. Іх запланавана каля сотні. Гэта як кірмашы выхаднога дня ў гарадах, райцэнтрах і аграгарадках вобласці, так і буйныя рэгіянальныя кірмашы з самым шырокім асартыментам. 4 кастрычніка такія рэгіянальныя кірмашы пройдуць у Барысаве, Бараўлянах і Маладзечне,
5 кастрычніка — у Нясвіжы, 11 кастрычніка — у Вілейцы і Салігорску, 18 кастрычніка — у Жодзіне і Слуцку. Працаваць яны будуць з 10 да 16-17 гадзін.
У месцах правядзення кірмашоў плануюцца культурна-забаўляльныя мерапрыемствы з выступленнямі творчых калектываў і інтэрактывамі для дзяцей. Усюды будзе арганізавана аказанне дапамогі па дастаўцы прадукцыі ветэранам вайны, адзінокім пажылым людзям, інвалідам 1-й і 2-й груп. Яе будуць ажыццяўляць валанцёры — яны даставяць усё неабходнае як да дому, так і да транспартнага сродку.
— З улікам добрага ўраджаю і вялікай колькасці сельгасвытворцаў, мяркую, кірмашы будуць карыстацца попытам як у жыхароў рэгіёна, так і ў мінчан, — рэзюмавала начальнік галоўнага ўпраўлення гандлю і паслуг Мінскага аблвыканкама Наталля СУЙКОВА.
