У форуме эканамічнага супрацоўніцтва, прымеркаванага да Дня Мінска, удзел прымуць прадстаўнікі 19 краін. Пра гэта паведаміла намеснік старшыні камітэта эканомікі Мінгарвыканкама Таццяна Селівонік на прэс-канферэнцыі «Правядзенне святочных мерапрыемстваў у горадзе Мінску, прысвечаных Дню горада. Пытанні забеспячэння грамадскай бяспекі», перадае БелТА.
Напярэдадні Дня горада ў сталіцы пройдзе традыцыйны, чацвёрты па ліку, форум эканамічнага супрацоўніцтва. Сёлета яго тэмай стане «Мост супрацоўніцтва: ад высокіх тэхналогій медыцыны да турыстычнага патэнцыялу».
«Для ўдзелу ў форуме зарэгістравалася больш за 250 удзельнікаў з 19 краін, а таксама 13 рэгіёнаў Расіі. Вялікая дэлегацыя прыедзе з Індыі, чакаем гасцей з Кітая. Ну і наш галоўны гандлёвы партнёр — гэта Расія», — распавяла Таццяна Селівонік.
Удзельнікам форуму будзе прадстаўлена выстава, дзе сталічныя вытворцы пазнаёмяць са сваёй прадукцыяй, а здраўніцы і гасцініцы прадэманструюць турыстычны патэнцыял.
«Форум — гэта добрая пляцоўка для прадстаўнікоў бізнесу і ўлады, для пошуку новых кантактаў і пашырэння існуючых. Па выніках пройдзе падпісанне важных дакументаў аб супрацоўніцтве», — адзначыла Таццяна Селівонік.
