Старшыня Брэсцкага аблвыканкама Пётр Пархомчык адзначыў, што пытанне сур’ёзнае, бо датычыцца бяспекі людзей. «МНС канстатуе, што ў нас ужо ёсць загінуўшыя. Купальны сезон яшчэ не пачаўся, а некаторыя апярэджваюць падзеі. Усе пляжы трэба прывесці ў належны парадак. Асобная ўвага павінна быць стыхійным месцам, куды людзі едуць, плаваюць, распіваюць спіртное. Мы павінны ведаць гэтыя пункты і глядзець, якім чынам там развіваюцца падзеі. Звычайна так атрымліваем негатыўныя моманты, пра якія я сказаў. Трэба ўважліва падрыхтавацца, каб мінімізаваць узнікненне трагедый», — падкрэсліў кіраўнік Брэсцкай вобласці.

У паўднёва-заходнім рэгіёне па рашэнні гарадскіх і раённых выканкамаў у 2025 годзе зацверджаны 104 зоны адпачынку ля вадаёмаў, з іх 98 — з правам купання. У Баранавіцкім раёне выканалі комплекс работ, каб у гэтым сезоне людзі змаглі купацца на тэрыторыі зоны адпачынку «Паўлінава». Пляж уладкавалі на сажалцы паблізу Косаўскага палацава-паркавага комплексу ў Івацэвіцкім раёне.

Па дадзеных УУС Брэсцкага аблвыканкама, у рэгіёне ўлетку насельніцтва наведвае каля 50 стыхійных месцаў масавага купання. Там спецыялісты ўстанаўліваюць папераджальныя знакі, аднак многія грэбуюць забаронамі і выкананнем правіл паводзін на вадзе. У мінулым годзе, паводле інфармацыі АСВОД, у вадаёмах вобласці загінулі пры купанні 13 чалавек. Усе такія няшчасныя выпадкі здарыліся ў месцах, дзе купанне не дазволена. Дзе дазваляюць магчымасці, папулярныя сярод адпачывальнікаў дзікія пляжы пераабсталююць. 

Месцы адпачынку падрыхтавалі да пачатку купальнага сезона. Спецыялісты навялі парадак на сушы, абследавалі і ачысцілі акваторыі ад смецця і расліннасці, адрамантавалі або замянілі душавыя кабінкі, лежакі, ценявыя навесы, спартыўныя і гульнявыя пляцоўкі, уладкавалі мангалы, веласіпедныя і аўтамабільныя паркоўкі. Таксама прадстаўнікі санітарнай службы праводзілі адборы пробаў вады, адхіленняў па мікрабіялагічных паказчыках не выяўлена.

Адзначана, што ў цэлым месцы масавага адпачынку ў Брэсцкай вобласці гатовы да лета. Аднак з-за нестабільнага надвор’я купальны сезон пакуль у рэгіёне не стартаваў.