У Брэсце ў жылым доме ўзніклі непаладкі з электрычнасцю з-за размешчанай на першым паверсе піцэрыі, паведамляе БелТА са спасылкай на Камітэт дзяржаўнага кантролю (КДК).

З дыскамфортам сутыкнуліся жыхары дома на вуліцы Камсамольскай. Аб праблеме яны паведамілі ў гарадскія камунальныя службы, перапіска вялася каля года. У доме неаднаразова ўхілялі няспраўнасці, аднак ліквідаваць іх не ўдавалася. У кватэрах па-ранейшаму міргала святло. Жыхары звярнуліся ў КДК Брэсцкай вобласці.

«Па даручэнні кантрольнага ведамства адказныя службы правялі дэталёвы разбор і ўстанавілі, што прычынай непаладак у рабоце сістэмы электразабеспячэння з’яўлялася абсталяванне, якое выкарыстоўвала размешчаная ў гэтым жылым доме піцэрыя. Уласніку аб’екта харчавання было ўручана патрабаванне аб неадкладным устараненні прычын пагаршэння якасці электразабеспячэння, а электраўстаноўкі парушальніка адключаны да выканання ім законных патрабаванняў», — расказалі ў КДК.

У выніку ўладальнік піцэрыі замяніў няспраўнае абсталяванне. Перапады напружання ў электрычнай сетцы дома спыніліся.