Тут растлумачылі, што праграмай вызначаюцца сярэднетэрміновыя параметры рэспубліканскага бюджэту (агульны аб’ём расходаў і даходаў, гранічны памер дэфіцыту, гранічныя аб’ёмы расходаў на дзяржаўныя праграмы); меры бюджэтна-падатковай палітыкі, неабходныя для рэалізацыі сярэднетэрміновай фінансавай праграмы (забеспячэнне збалансаванасці рэспубліканскага і мясцовых бюджэтаў у межах наяўных даходаў і крыніц фінансавання дэфіцыту (памеру прафіцыту) бюджэту); канцэнтрацыя бюджэтных сродкаў на прыярытэтных кірунках сацыяльна-эканамічнага развіцця краіны; своечасовае і ў поўным аб’ёме ажыццяўленне плацяжоў па дзяржаўным доўгу, падатковая нагрузка на эканоміку Рэспублікі Беларусь на ўзроўні, які не перавышае 26 % ад валавога ўнутранага прадукту; захаванне сацыяльнай арыентаванасці расходаў, рэалізацыя шэрагу мер, накіраваных на павышэнне якасці жыцця насельніцтва, дабрабыту работнікаў бюджэтнай сферы, падтрымка найбольш уразлівых слаёў насельніцтва.

Ва ўрадзе дадалі, што праграма зацверджана ў мэтах забеспячэння доўгатэрміновай збалансаванасці рэспубліканскага і мясцовых бюджэтаў, выканання дзяржавай сваіх даўгавых абавязацельстваў, а таксама ацэнкі бюджэтных рызык для своечасовай прапрацоўкі мер па іх мінімізацыі.

Як растлумачылі ў Міністэрстве фінансаў, сярэднетэрміновая фінансавая праграма — гэта планавая траекторыя развіцця, якая задае ключавыя арыенціры для кіравання дзяржаўнымі фінансамі на бліжэйшыя тры гады. 

У профільным міністэрстве выдзелілі некалькі базавых падыходаў, на якіх будуецца праграма на 2026—2028 гады.

Першы — падатковая прадказальнасць (гаворка ідзе аб развіцці сістэмы без рэзкіх фіскальных шокаў). 

Другі — рацыянальнае размеркаванне рэсурсаў (забяспечваецца строгая збалансаванасць бюджэтаў усіх узроўняў. Дзяржава канцэнтруе сродкі на тых кірунках, якія даюць рэальны сацыяльна-эканамічны эфект).

Трэці — сацыяльная накіраванасць (бюджэт захоўвае сваю галоўную функцыю — падтрымку грамадзян. У прыярытэце застаецца адрасная дапамога найбольш уразлівым слаям насельніцтва і безумоўнае забеспячэнне базавых сацыяльных гарантый).

Чацвёрты — адказная пазыковая палітыка (Беларусь працягне ў поўным аб’ёме выконваць свае абавязацельствы, планамерна зніжаючы даўгавую нагрузку).

Пяты — фінансавая ўстойлівасць (паступовае скарачэнне дэфіцыту і падтрыманне збалансаванасці бюджэтнай сістэмы).

Гаворачы аб прагнознай траекторыі рэспубліканскага бюджэту на 2026—2028 гады, у Мінфіне адзначылі, што на 2026 год запланаваны даходы ў памеры 54,38 мільярда рублёў, расходы — 58,73 мільярда рублёў (з дэфіцытам у 4,34 мільярда рублёў). На 2027 год прагназуюцца даходы ў памеры 60,07 мільярда рублёў і такой жа колькасці расходы (г. зн. чакаецца бездэфіцытны бюджэт), а на 2028 год — даходы ў памеры 66,88 мільярда рублёў, расходы — 63,11 мільярда рублёў (прафіцыт павінен скласці 3,77 мільярда рублёў). 

Што датычыцца скарачэння пазыковай нагрузкі, то адносіны дзярждоўгу да ВУП у бягучым годзе не павінны скласці больш за 26,1 %, у 2027-м — 24,3 %, у 2028 годзе — 22,8 %.