За 2021-2025 гады колькасць шматдзетных сем’яў павялічылася на 6 працэнтаў і сёння складае амаль 120 тыс. «З 1 студзеня 2026 года памер сямейнага капіталу складае 35 505 бел. руб. — гэта ў 1,5 раза вышэй за ўзровень 2020 года. Толькі ў мінулым годзе адкрыта 8 тыс. новых укладаў», — расказаў міністр.

Ён нагадаў, што сродкі сямейнага капіталу можна выкарыстоўваць на паляпшэнне жыллёвых умоў, атрыманне адукацыі, медыцынскія паслугі. За ўвесь перыяд рэалізацыі праграмы адкрыта больш за 151 тыс. укладаў.

Акрамя таго, у краіне прадугледжана дадатковая падтрымка сем’яў з дзецьмі-інвалідамі. Напрыклад, захавана права на атрыманне ўсіх відаў дапамог на перыяд аказання медыка-сацыяльнай дапамогі ў доме дзіцяці (да 56 дзён у годзе), таксама бацькі, якія даглядаюць дзіця-інваліда, могуць бясплатна прайсці навучанне або перанавучанне па накіраванні службы занятасці.

У 2025 годзе ў два разы павялічаны мінімальны памер дапамогі па цяжарнасці і родах для студэнтак і маладых спецыялістаў. «Цяпер маладыя маці, якія толькі пачынаюць свой прафесійны шлях або атрымліваюць адукацыю, могуць разлічваць на больш важкую падтрымку», — адзначыў Андрэй Лабовіч.

У планах мадэрнізацыя сістэмы дапамог, пашырэнне дзіцячай інфраструктуры, адкрыццё ясельных груп там, дзе ёсць запыт, інфармацыйная работа па пашырэнні сямейных каштоўнасцей, асабліва сярод моладзі. «Год беларускай жанчыны — гэта магчымасць сканцэнтраваць намаганні на тым, каб жанчына магла паспяхова сумяшчаць кар’еру, мацярынства і самарэалізацыю. Дзяржава стварыла фундамент, цяпер будзем рухацца далей», — рэзюмаваў міністр.