З 3 ліпеня 2026 года перапланіроўка жылля перастане быць галаўным болем. Пастанова Савета Міністраў № 164 адмяняе лішнія бюракратычныя бар’еры і робіць многія рамонтныя работы больш простымі і даступнымі.

У камітэце таксама расказалі пра ключавыя новаўвядзенні. «Цяпер для ўладкавання гідра-, пара- і гукаізаляцыі ў кватэры не спатрэбіцца распрацоўваць праект. Таксама больш не абавязкова заключаць дагавор будаўнічага падраду — работы можна выканаць самастойна або з прыцягненнем спецыялістаў. Акрамя таго, шкленне балконаў і лоджый больш не лічыцца перапланіроўкай. Аднак важна памятаць: яго неабходна выконваць у адпаведнасці з адзіным для дома варыянтам шклення (па колеры, матэрыяле і канфігурацыі), зацверджаным мясцовымі ўладамі. Для дамоў — гісторыка-культурных каштоўнасцяў спатрэбіцца дадатковае ўзгадненне з Міністэрствам культуры», — растлумачылі спецыялісты.

Таксама пісьмовую згоду іншых уласнікаў на перапланіроўку больш не трэба завяраць у натарыуса. Стала прасцейшай працэдура атрымання дазволу на ўстаноўку індывідуальных антэн і вонкавых блокаў кандыцыянераў на фасадах і дахах. З пераліку патрэбных дакументаў выключана план-схема з пазначэннем месца размяшчэння абсталявання. Аднак само ўзгадненне па-ранейшаму застаецца абавязковым. 

Змены не закранаюць работ, якія ўплываюць на канструктыўную бяспеку будынкаў. Па-ранейшаму патрабуецца поўны пакет дазвольнай дакументацыі для ўмяшання ў апорныя канструкцыі, сістэмы газазабеспячэння, ацяплення або смеццевыдалення.