Як паведамілі ў СК, фігурантам справы з’яўляецца 25-гадовы мясцовы жыхар, які ўжо мае судзімасць за махлярства. У 2019 годзе ён пераконваў знаёмых аформіць крэдыты на смартфоны і перадаць тэхніку яму, абяцаючы самастойна пагашаць запазычанасць. Замест гэтага маладыя людзі заставаліся з абавязацельствамі перад банкамі, а ўстройства зламыснік хутка прадаваў, прысвойваючы атрыманыя сродкі.

Пасля выхаду на волю мужчына перайшоў да новай схемы, разлічанай на больш буйныя сумы. Карыстаючыся даверам знаёмых, ён прапаноўваў садзейнічанне ў куплі аўтамабіляў з ЗША і Еўропы «па зніжаных цэнах».

За два гады, паводле даных следства, яму ўдалося атрымаць ад сямі жыхароў Мінска і Баранавічаў больш за 220 тысяч рублёў. Ніякіх транспартных сродкаў ён не набываў — грошы ішлі на асабістыя расходы, уключаючы азартныя гульні.

Каб утрымліваць давер, мужчына прыдумляў розныя тлумачэнні: расказваў пра затрымкі паставак, няўдалыя здзелкі, цяжкія жыццёвыя абставіны і праблемы са здароўем. Затым і зусім перастаў выходзіць на сувязь. Ашуканыя грамадзяне звярнуліся ў праваахоўныя органы.

У дачыненні да жыхара Баранавічаў распачата крымінальная справа паводле ч. 4 арт. 209 КК Рэспублікі Беларусь — махлярства ў асабліва буйным памеры. У цяперашні час ён знаходзіцца ў месцах пазбаўлення волі, адбываючы пакаранне па іншай справе, звязанай з захоўваннем наркотыкаў.