З 1 кастрычніка грашовыя нормы расходаў на харчаванне будуць павялічаны на 5% для навучэнцаў агульнаадукацыйных школ, дашкольных і іншых устаноў адукацыі. Як паведамілі ў Міністэрстве адукацыі, навацыя закране навучэнцаў адукацыйных і аздараўленчых устаноў.
Гэты крок будзе зроблены з адзінай важнай мэтай — для ўмацавання здароўя падрастаючага пакалення і забеспячэнне дзяцей збалансаваным, якасным харчаваннем. Даўно даказана, што асновай моцнага здароўя, добрых працаздольнасці і самаадчування дзяцей служыць правільнае харчаванне. Таму пытанне ўдасканалення сістэмы харчавання ў школах, дзіцячых садках, інтэрнатах, цэнтрах рэабілітацыі і аздараўленчых лагерах паслядоўна вырашаецца на дзяржаўным узроўні. Павышэнне грашовых нормаў дазволіць уключаць у меню школьнікаў і дашкалят больш разнастайныя, натуральныя і якасныя прадукты, якія адпавядаюць сучасным патрабаванням да дзіцячага рацыёну.
Што тычыцца нормаў, то яны распрацаваны на аснове аналізу цэн на прадукты харчавання, які праводзіцца кожныя тры месяцы. Такі падыход забяспечвае аб’ектыўнасць і празрыстасць фарміравання выдаткаў на харчаванне, а змяненне стане важным крокам на шляху да ўстойлівай, якаснай і даступнай сістэме дзіцячага харчавання, дзе галоўным арыенцірам застаецца клопат пра здароўе падрастаючага пакалення.
Нагадаем, што ў апошні раз нормы выдаткаў на харчаванне былі ўведзеныя 1 верасня 2023 года. У адпаведнасці з артыкулам 40 Кодэкса аб адукацыі, харчаванне прапануецца ўсім навучэнцам ва ўстановах агульнай сярэдняй адукацыі. Бясплатнае харчаванне прадастаўляецца ўсім навучэнцам 1-4 класаў, вучням 5-11 класаў, якія пражываюць і навучаюцца ў сельскіх школах, дзецям з іншых ільготных катэгорый (шматдзетныя і маламаёмасныя сем’і, дзеці-інваліды, навучэнцы спартыўных класаў і інш.) — па адной пацверджанай падставе. Фармат харчавання можа быць аднаразовым, двух-або трохразовым.
Важна: пры платным харчаванні бацькі аплачваюць толькі кошт прадуктаў — паслугі па прыгатаванні страў уваходзяць ў дзяржаўную падтрымку.
Алена ВІНАГРАДАВА
Фота Лізаветы ГОЛАД
