Як адзначыў міністр, рабатызацыя — адзін з асноўных фактараў павышэння тэхналагічнасці эканомікі ў новай пяцігодцы. Паводле яго слоў, вырашэнне гэтай задачы вядзецца адначасова па двух напрамках. Першы — стымуляванне ўкаранення прамысловых робатаў. «Для гэтага адпаведныя паказчыкі заклалі ў галіновыя і рэгіянальныя праграмы на пяцігодку. Рэгулятарам і аблвыканкамам дадзена даручэнне ўжо да 1 сакавіка 2026 года падрыхтаваць планы мерапрыемстваў па ўкараненні робатаў», — расказаў Юрый Чабатар.

Таксама кіраўнік міністэрства паведаміў, што цяпер ідзе распрацоўка комплекснай праграмы, у рамках якой неабходна вырашыць шэраг задач. У навукова-інавацыйнай сферы — сфарміраваць заданні навукова-тэхнічных праграм і дзяржаўных праграм навуковых даследаванняў па робататэхніцы, у стандартызацыі і сертыфікацыі — распрацаваць стандарты ў галіне робатабудавання, спрасціць парадкі сертыфікацыі і дэкларавання адпаведнасці для робататэхнічнага абсталявання, якое ўвозіцца. А ў кадравай сферы — стварыць бесперапынную вертыкаль адукацыі (школа, каледж/ВНУ, вытворчасць).

Другі напрамак — развіццё ўласнай вытворчасці робатаў і іх інжынірынгу. «Сёння ў нас фарміруюцца кампетэнцыі для вытворчасці дакладных рэдуктараў, сервапрывадаў, мікраэлектронікі і іншых кампанентаў, неабходных для стварэння айчыннага робата. Практыка паказала, што „жалеза“ займае ў кошце робататэхнічнай сістэмы 20-30%. Асноўнае — праграмнае забеспячэнне і веданне таго, як увязаць робата ў тэхналагічны працэс, гэта значыць інжынірынг. І гэтыя кампетэнцыі ў Беларусі ёсць. Прапануем працягваць іх развіваць на базе Парка высокіх тэхналогій. А ў далейшым магчыма паслядоўна развіваць айчынную вытворчасць камплектуючых», — растлумачыў Юрый Чабатар.

Таксама міністр нагадаў аб існуючых стымулах для тых прадпрыемстваў, якія распрацоўваюць або ўкараняюць у свае вытворчыя працэсы робататэхніку.