За 2025 год было складзена 143 папярэджанні аб неспрыяльных гідраметэаралагічных з’явах, расказала Марына Грыцкевіч. «Найбольшая колькасць папярэджанняў прыпала на летні сезон, бо на гэты час выпадае перыяд навальнічнай дзейнасці, звязанай з актыўнай канвекцыяй, а ў перыяд глабальнага змянення клімату такія змены становяцца частымі і ўсё больш інтэнсіўнымі. За тры летнія месяцы было складзена 64 папярэджанні аб неспрыяльных гідраметэаралагічных з’явах: 21 — у чэрвені, 28 — у ліпені і 15 — у жніўні. Менш за ўсё папярэджанняў было складзена за зімовы сезон — 19. Пры гэтым у снежні іх колькасць склала 7, у студзені — 12, а ў лютым 2025 года іх не было», — патлумачыла яна. 

Начальнік службы метэаралагічных прагнозаў Белгідрамета адзначыла, што больш за ўсё ў папярэджаннях згадвалася навальніца (51), моцныя ліўні (39), вецер (40), шквал (34), туман (30). На высокія тэмпературы — плюс 30 і вышэй прыйшлося 19 папярэджанняў, на град і моцныя дажджы — 14, на замаразкі — 9. «Адзін раз у папярэджаннях згадвалася завіруха, вельмі моцны снег і вельмі моцныя ліўні. Па колькасці складзеных папярэджанняў 2025 год знаходзіцца на трэцім месцы, саступаючы 2022 году — тады іх было выпісана 149, а першае месца належыць 2024-му — 154 папярэджанні, — падзялілася інфармацыяй Марына Грыцкевіч. — Разам з тым, у 2025 годзе ўдалося павялічыць своечасовасць папярэджанняў у дачыненні да 2024-га. У сярэднім час паміж складзеным папярэджаннем і часам, калі з’ява дасягнула неспрыяльнай гідраметэаралагічнай з’явы, склаў 16 гадзін 7 хвілін. У 2024 годзе гэты час быў 15 гадзін 40 хвілін». 

Белгідрамет штогод рэгіструе да 20 небяспечных гідраметэаралагічных з’яў. «Большасць з іх носіць лакальны характар і прыпадае на цёплы перыяд года з мая па верасень. Найбольш часта ўзнікаюць небяспечныя з’явы ў краіне — гэта вельмі моцная спякота (да 35 градусаў і вышэй), надзвычайная пажарная небяспека, замаразкі ў перыяд актыўнай вегетацыі, вельмі моцныя дажджы і ліўні, вельмі моцны вецер, у тым ліку і шквал. Толькі такая небяспечная з’ява, як вельмі моцны мароз (мінус 35 градусаў і ніжэй), у апошнія гады не сустракаецца», — падкрэсліла яна.

У 2025 годзе было складзена 12 штармавых папярэджанняў аб небяспечных гідраметэаралагічных з’явах, праінфармавала Марына Грыцкевіч. «Пры гэтым вялікая іх частка (11) была складзена на замаразкі і адно на вельмі моцныя ліўні. Мінулы год заняў другое месца па колькасці штармавых папярэджанняў, саступаючы 2024 году, калі іх колькасць склала 24. Пры гэтым у 2025 годзе было зарэгістравана 22 небяспечныя гідраметэаралагічныя з’явы: 11 з іх — на вельмі моцны дождж, два — на шквал і вельмі моцны вецер, адно — на град і вельмі моцны лівень, і яшчэ адно — на моцнае наліпанне мокрага снегу», — падсумавала начальнік службы метэаралагічных прагнозаў Белгідрамета.